Першы дзень фестывалю завяршыўся экскурсійнай праграмай. Аргкамітэт прапанаваў фіналістам на выбар два розныя маршруты: знаёмства з гістарычным цэнтрам Гродна і выязную экскурсію па фартыфікацыйных умацаваннях. Выязную экскурсію правёў дацэнт кафедры гісторыі Беларусі, археалогіі і спецыяльных гістарычных дысцыплін Аляксей Загідулін. Першым пунктам у экскурсійным маршруце стаў Форт №2 Гродзенскай крэпасці, які знаходзіцца побач з в. Навумавічы Гродзенскага раёна. Фартыфікацыйнае збудаванне было пабудавана ў пачатку ХХ стагоддзя. У Першую сусветную вайну сістэма фартыфікацыйных збудаванняў каля Гродна павінна была стаць надзейным шчытом ад ворагаў, аднак была ўзарвана адступаючым рускім войскам у 1915 годзе. У перыяд Вялікай Айчыннай вайны Форт №2 стаў месцам масавага знішчэння жыхароў горада Гродна, бліжэйшых вёсак, а таксама савецкіх ваеннапалонных і вязняў гродзенскага гета. Удзельнікі экскурсіі ўсклалі кветкі да помніка Балеснай маці і ўшанавалі памяць ахвяр хвілінай маўчання.

Экскурсія працягнулася, і наступным у маршрутным лісце стаў Аўгустоўскі канал, размешчаны на мяжы Польшчы, Літвы, Беларусі. Уздоўж канала размешчаны ДАК - доўгачасовыя агнявыя кропкі, якія былі ўзведзены напярэдадні Вялікай Айчыннай вайны і ўваходзілі ў так званую "Лінію Молатава". Аляксей Загідулін распавёў экскурсантам аб тым, што сістэма ДАКаў была пабудавана такім чынам, каб забяспечваць агнявую абарону ўздоўж Аўгустоўскага канала. Менавіта тут раніцай 22 чэрвеня 1941 года прагучалі першыя стрэлы вайны, якая ўвайшла ў гісторыю пад назвай Вялікая Айчынная. Сёння ДАК прыцягваюць шматлікіх турыстаў: пакрытыя шрамамі ад снарадаў і аскепкаў, вывярнуўшы вонкі пашкоджаны бетон і выгнутыя пруты арматуры, яны маўкліва стаяць уздоўж беларуска-польскай мяжы, як сведкі страшных падзей 1941 года. У час экскурсіі ўдзельнікі змаглі дакрануцца да ваеннай гісторыі Гродзенскай зямлі і атрымалі сапраўдны ўрок памяці.