На факультэце матэматыкі і інфарматыкі адбылася алімпіяда па матэматыцы сярод студэнтаў універсітэта. У алімпіядзе прынялі ўдзел 28 студэнтаў 4 факультэтаў: факультэта матэматыкі і інфарматыкі, фізіка-тэхнічнага факультэта, факультэта эканомікі і кіравання і факультэта інавацыйных тэхналогій машынабудавання. Перад удзельнікамі алімпіяды з прывітальным словам выступіла дэкан факультэта матэматыкі і інфарматыкі Алена Лівак.Купалаўцам было прапанавана вырашыць задачы, якія адпавядаюць прадметнай вобласці "Матэматыка". Папярэднія звесткі, неабходныя ўдзельнікам для разумення і вырашэння заданняў алімпіяды адпавядаюць дзеючым адукацыйным стандартам па спецыяльнасцях устаноў вышэйшай адукацыі ў Рэспубліцы Беларусь і вучэбных праграмах па матэматычных дысцыплінах. Аднак для рашэння задач неабходна было праявіць творчыя здольнасці і прадэманстраваць нестандартнасць мыслення.
Вынікі падводзіліся ў асабістым заліку па дзвюх групах. У групе "А" спаборнічалі студэнты тых спецыяльнасцей, на якіх за ўвесь перыяд навучання вучэбнымі планамі прадугледжана больш за 440 аўдыторных гадзін па дысцыплінах матэматычнага цыкла, у групе "Б" - не больш за 440 аўдыторных гадзін.
Так, у групе "А" дыплом I ступені атрымаў студэнт 2 курса факультэта матэматыкі і інфарматыкі Максім Сербул. Дыпломам II ступені ўзнагароджаны таксама студэнт 1 курса факультэта матэматыкі і інфарматыкі Павел Цыркуновіч. Уладальнікам дыплома III ступені стаў студэнт 2 курса факультэта матэматыкі і інфарматыкі Рыгор Беззубік.
У групе "Б" перамога дасталася студэнту 2 курса факультэта матэматыкі і інфарматыкі Яўгену Занеўскаму. Дыпломы II ступені ўручылі студэнту 2 курсы факультэта эканомікі і кіравання Максіму Ланцэвічу і студэнту 3 курса факультэта інавацыйных тэхналогій машынабудавання Канстанціну Касцюкевічу. Уладальнікамі дыпломаў III ступені сталі студэнт 2 курса факультэта матэматыкі і інфарматыкі Іван Дзятчэня і студэнт 2 курса факультэта эканомікі і кіравання Ягор Анікевіч.
