10 красавіка студэнтка спецыяльнасці «Вытворчасць прадукцыі і арганізацыя грамадскага харчавання» факультэта біялогіі і экалогіі ГрДУ імя Янкі Купалы Кіра Смаль узнагароджана дыпломам II ступені на Міжнародным конкурсе навукова-даследчых работ студэнтаў, аспірантаў і маладых вучоных у галіне тэхнічных навук.Конкурс, які праходзіў на базе Губкінскага філіяла ФДБОУВА «Белгарадскі дзяржаўны тэхналагічны ўніверсітэт імя У.Р. Шухава», сабраў мноства таленавітых удзельнікаў з розных краін, што зрабіла яго не толькі пляцоўкай для абмену ведамі, але і магчымасцю для прафесійнага росту.
Кіра Смаль прадставіла сваю навуковую працу на тэму «Кіраванне якасцю і кантроль рызык у гандлёвым аб'екце грамадскага харчавання». У сваім даследаванні яна прааналізавала ключавыя аспекты кіравання якасцю ў сферы грамадскага харчавання, што мае важнае значэнне для павышэння стандартаў абслугоўвання і бяспекі. Навуковым кіраўніком выступіла старшы выкладчык кафедры тэхналогіі, фізіялогіі і гігіены харчавання Анастасія Кучар.
Дыплом II ступені стаў не толькі асабістай перамогай Кіры, але і гонарам для ўсяго факультэта. Гэта дасягненне падкрэслівае высокі ўзровень падрыхтоўкі студэнтаў Купалаўскага ўніверсітэта і іх імкненне да навуковых даследаванняў.
