У Дзень Ведаў у Гродзенскім дзяржаўным універсітэце імя Янкі Купалы прайшла традыцыйная сустрэча прарэктара па вучэбнай рабоце Генадзія Аляксеевіча Гачко з магістрантамі 1 курса. У гэтым годзе студэнтамі II ступені атрымання вышэйшай адукацыі ў нашай альма-матэр сталі 354 чалавекі.
Вітаючы магістрантаў, Генадзій Аляксеевіч адзначыў, што многія кіраўнікі пры прыёме на работу ўлічваюць і тое, ці ёсць у суіскальніка акадэмічная ступень. Асабліва гэта актуальна ў сферы эканомікі і юрыспрудэнцыі. Пры гэтым прарэктар па вучэбнай рабоце падкрэсліў, што вучоба на II ступені атрымання вышэйшай адукацыі няпростая.
– У канцы навучання вы прадставіце магістарскую дысертацыю - буйную і грунтоўную навуковую працу. У ёй абавязкова павінны прысутнічаць вынікі ўласных навуковых даследаванняў, якія здольныя вырашыць лакальную праблему ў вашай прафесійнай дзейнасці, - распавёў Генадзій Аляксеевіч Гачко.
Сказаныя на дарогу словы прагучалі таксама ад начальніка вучэбна-метадычнага ўпраўлення Марыны Яцэкаўны Калацэй і начальніка вучэбнага аддзела вучэбна-метадычнага ўпраўлення Анатолія Іосіфавіча Багдзевіча.
–У наш час не так шмат людзей, якія маюць акадэмічную ступень магістра, - адзначыла Марына Яцэкаўна. - У першую чаргу магістр адрозніваецца ад спецыяліста больш шырокім кругаглядам ў сваёй вобласці, здольнасцю глыбока аналізаваць і прымаць адказныя рашэнні ў нестандартных сітуацыях.
У канцы сустрэчы метадысты кіравання Аксана Генрыхаўна Дабрук і Вольга Вячаславаўна Дробыш азнаёмілі магістрантаў з навучальным працэсам на II ступені вышэйшай адукацыі, навучальным раскладам і адказалі на пытанні магістрантаў.
Нагадаем, што ў гэтым годзе ў магістратуры конкурс быў абвешчаны на 27 спецыяльнасцяў акадэмічных адукацыйных праграм і 11 праграм з паглыбленай падрыхтоўкай спецыяліста (так званая практыка-арыентаваная магістратура). Самымі папулярнымі сярод абітурыентаў магістратуры сталі спецыяльнасці IT-профілю.
Гродзенскі дзяржаўны ўніверсітэт імя Янкі Купалы