31 кастрычніка кафедра электратэхнікі і электронікі фізіка-тэхнічнага факультэта ГрДУ імя Янкі Купалы сустрэла навучэнцаў інжынернага класа сярэдняй школы №39 імя І.Дз. Лебедзева горада Гродна.
Рабятам прадэманстравалі працу прамысловага калабаратыўнага робата-маніпулятара і прапанавалі выканаць простыя задачы па кіраванні робатам.
У рамках заняткаў былі прадстаўлены асноўныя прынцыпы працы робатаў і іх ужыванне ў сучасным свеце. Навучэнцы атрымалі магчымасць на практыцы пазнаёміцца з праграмаваннем робатаў і кіраваннем імі. Яны таксама азнаёміліся з асноўнымі тыпамі робатаў і вывучылі прынцыпы працы сэнсараў і механізмаў.
Таксама школьнікі мелі магчымасць паразмаўляць са студэнтамі 4 курса спецыяльнасці «Прамысловыя робаты і робататэхнічныя комплексы» і студэнтамі 2 курса спецыяльнасці «Тэхнічная эксплуатацыя энергаабсталявання арганізацый». Навучэнцаў інжынернага класа цікавілі пытанні аб інжынерных спецыяльнасцях кафедры электратэхнікі і электронікі, аб навуковых гуртках на факультэце, аб пазавучэбных занятках і аб размеркаванні выпускнікоў.
Мерапрыемства дапамагло будучым інжынерам пашырыць гарызонты ведаў і пазнаёміцца з новымі магчымасцямі, якія адкрывае перад імі робататэхніка.
Гродзенскі дзяржаўны ўніверсітэт імя Янкі Купалы