Купалаўскі ўніверсітэт – гэта вялікая інтэрнацыянальная сям'я, у якой шануюць і паважаюць культуру розных народаў. І ўжо даўно стала добрай традыцыяй спраўляць Кітайскі Новы год. Да свята маглі далучыцца ўсе ахвочыя. Расказваем, што цікавага падрыхтавалі арганізатары.
Старт святу дало ўрачыстае адкрыццё мерапрыемства. Да гасцей звярнуўся першы прарэктар Гродзенскага дзяржаўнага ўніверсітэта імя Янкі Купалы Аляксандр Карэўскі, які перадаў цёплыя пажаданні ад рэктара Ірыны Кітурка і ўручыў падзяку Даніілу Кулікоўскіх, прадстаўніку адукацыйнага цэнтра «Яацянь».
Як распавёў прарэктар па вучэбнай працы Лявонцій Паўлаў, першапачаткова Кітайскі Новы год святкаваўся ў рамках факультэта гісторыі, камунікацыі і турызму, але зараз урачыстасць набыла ўніверсітэцкі маштаб. Гэтаму садзейнічала жаданне студэнтаў, а таксама адкрыццё Кітайска-беларускага цэнтра па рэалізацыі праекта "Бан Мо (Рубен.Мазі) каледж" у напрамку "Дашкольная адукацыя". Гэта падзея стала важным крокам ва ўмацаванні сувязей паміж Беларуссю і Кітаем у сферы адукацыі.
Пасля афіцыйнага адкрыцця святочных мерапрыемстваў адбыліся майстар-класы, якія сталі праваднікамі ў свет усходняй культуры. Удзельнікі змаглі дакрануцца да кітайскіх традыцый і прасякнуцца тонкім і прыгожым мастацтвам Паднябеснай. Госці свята атрымалі ўрокі ігры на традыцыйных кітайскіх інструментах, прапусцілі праз сябе матывы вялікага Кітая.
Не менш цікавым стаў майстар-клас, прысвечаны выразанню з паперы. У кітайскай культуры гэты асобны напрамак, які называецца цзяньчжы. Гэты від дэкаратыўна-прыкладнога мастацтва аднесены ЮНЕСКА да сусветнай культурнай спадчыны. Працы па складанасці бываюць самыя розныя, найболей майстэрскія нагадваюць карункі. Купалаўцы з вялікім задавальненнем паспрабавалі свае сілы ў гэтай карпатлівай справе.
Важная частка кітайскай культуры - чайная цырымонія, якая мае гісторыю працягласцю ў некалькі тысяч гадоў. Ёй таксама быў прысвечаны майстар-клас, які правялі прадстаўнікі адукацыйнага цэнтра "Яацянь".
Акрамя таго, у фае другога паверха была арганізавана выстава работ удзельнікаў конкурсаў, прысвечаных святкаванню Кітайскага Новага года. Тут госці змаглі ўбачыць крэатыўныя і арыгінальныя творы, якія адлюстроўваюць дух свята і натхненне студэнтаў.
Завяршыўся святочны дзень яскравым канцэртам, які падрыхтавалі кітайскія студэнты. Мерапрыемства стала яркім акордам гэтага насычанага дня. А адбылося гэтае свята дзякуючы Цэнтру інтэрнацыяналізацыі адукацыі, факультэту гісторыі, камунікацыі і турызму і Гуманітарнаму каледжу ГрДУ імя Янкі Купалы.
Гродзенскі дзяржаўны ўніверсітэт імя Янкі Купалы