Прыём дакументаў на дзённую форму атрымання сярэдняй спецыяльнай адукацыі за кошт сродкаў бюджэту працягнецца да 3 жніўня ўключна. Унутраныя ўступныя іспыты будуць праводзіцца згодна з раскладам у перыяд з 4 па 8 жніўня.
У суботу, 20 ліпеня, каледжы ГрДУ імя Янкі Купалы - Гуманітарны каледж, Ваўкавыскі каледж, Лідскі каледж і Тэхналагічны каледж - пачалі прымаць дакументы ад абітурыентаў.
Да пачатку другога дня працы прыёмнай камісіі Гуманітарнага каледжа дакументы падалі больш за 400 чалавек на 285 месц. У гэтым годзе каледж ажыццяўляе набор навучэнцаў толькі на бюджэтнай аснове, на базе 9 класаў. У абітурыентаў ёсць магчымасць адвучыцца тут тры гады, а пасля паступіць на скарочаную форму атрымання адукацыі ў Гродзенскі дзяржаўны ўніверсітэт імя Янкі Купалы.
Другі дзень падачы заяў у Ваўкавыскім каледжы быў не менш гарачым, чым першы. Абітурыенты падалі 57 заяў. Самай запатрабаванай стала спецыяльнасць "Дызайн (графічны)". Другое месца заняла спецыяльнасць "Пачатковая адукацыя" - 25 заяў. Трэцяя пазіцыя - "Арганізацыя турыстычных паслуг" - 18 заяў.
Лідскі каледж Купалаўскага ўніверсітэта ажыццяўляе набор абітурыентаў на аснове агульнай базавай адукацыі па 8 спецыяльнасцях: «Тэхнічнае абслугоўванне і рамонт транспартных сродкаў», «Абслугоўванне і рамонт аўтамабіляў», «Тэхнічная эксплуатацыя сродкаў вылічальнай тэхнікі», «Тэхнічная эксплуатацыя прыбораў і апаратаў», «Планава-эканамічная і аналітычная дзейнасць», «Будаўніцтва будынкаў і збудаванняў», «Дашкольная адукацыя», «Пачатковая адукацыя».
У Тэхналагічным каледжы ГрДУ імя Янкі Купалы праходзіць прыём дакументаў на спецыяльнасці хімічнай галіны, электразабеспячэння, аўтаматызацыі вытворчасці, дрэваапрацоўкі, металаапрацоўкі, цеплагазазабеспячэння, праграмнага забеспячэння. На аснове агульнай сярэдняй адукацыі набор ажыццяўляецца па 9 спецыяльнасцях.
Падрабязную інфармацыю аб ходзе прыёмнай кампаніі, прапанаваных спецыяльнасцях, тэрмінах падачы дакументаў і правядзення ўступных іспытаў можна даведацца на сайце ў раздзеле «Абітурыенту». З прахаднымі баламі мінулых гадоў і планам набору можна на сайтах Ваўкавыскага, Лідскага, Гуманітарнага і Тэхналагічнага каледжаў.
Гродзенскі дзяржаўны ўніверсітэт імя Янкі Купалы