Візіт студэнтаў Гродзенскага дзяржаўнага ўніверсітэта імя Янкі Купалы, сярод якіх прызёр рэспубліканскага конкурсу «Студэнт года - 2016», студэнтка педагагічнага факультэта Вераніка Кажанеўская, а таксама валанцёры атрада «Добрае сэрца», прайшоў у гонар Усебеларускай акцыі «За любімую Беларусь!».
Разам з гасцямі, у ліку якіх прадстаўнікі Гродзенскага абласнога камітэта ГА «БРСМ», і галоўным урачом Гродзенскага абласнога перынатальнага цэнтра Уладзімірам Звярко нашы студэнткі павіншавалі мам з нараджэннем малышоў. У рамках акцыі валанцёры падарылі жанчынам падарункі, а іх дзеткам - маляўнічыя распашонкі з сімвалам акцыі. Па словах дзяўчат, гэта стала першым прызнаннем у любові нованароджаным да сваіх родных, гораду і краіне.
– Моладзь Гродзеншчыны павіншавала 30 маладых мам, якія знаходзяцца ў цэнтры, з нараджэннем дзяцей, - адзначылі ў абласным камітэце ГА «БРСМ». - Адначасова актыў абласной арганізацыі БРСМ павіншаваў з пачаткам акцыі кіраўнікоў рэгіёну ў знак павагі і ўдзячнасці за падтрымку моладзевых ініцыятываў.
Акцыя «За любімую Беларусь!» дае магчымасць маладым людзям выказаць сваю любоў да сям'і і бацькоў, роднага горада і пасёлка, роднай Беларусі, а таксама выказаць словы шчырай падзякі сябрам, калегам і партнёрам арганізацыі. Акцыя будзе праходзіць на працягу ўсяго 2017 года. Яе мерапрыемствы прысвечаны розным знакавым падзеям, святам як краіны ў цэлым, так і асобных рэгіёнаў. Акрамя таго пройдуць марафоны добрых спраў, флэш-мобы, круглыя сталы, віктарыны, творчыя конкурсы, сустрэчы, дыялогі пакаленняў, канцэртныя праграмы, творчыя фестывалі. Ва ўрачыстай абстаноўцы лепшым прадстаўнікам моладзі таксама ўручаць членскія білеты грамадскай арганізацыі. Адметнай рысай акцыі стане раздача валанцёрамі ўсім жадаючым сімвала акцыі - стылізаваных чырвона-зялёных сэрцайкаў «За любімую Беларусь!», дзе кожны зможа напісаць добрыя словы і пажаданні сваім сябрам, сваім родным, гораду ці краіне.
Гродзенскі дзяржаўны ўніверсітэт імя Янкі Купалы