Сустрэча на тэму «Новае лічбавае асяроддзе як фактар развіцця рэгіянальных СМІ» адбылася на базе абласной газеты "Гродзенская праўда".
Галоўныя рэдактары раённых газет Гродзенскай вобласці, кіраўніцтва газеты "Гродзенская праўда", прадстаўнікі Гродзенскага аблвыканкама і ГрДУ імя Янкі Купалы сабраліся, каб абмеркаваць асаблівасці работы раённых СМІ на сучасным этапе, а таксама выкарыстанне актуальных інструментаў манетызацыі кантэнту.
Начальнік галоўнага ўпраўлення ідэалагічнай работы і па справах моладзі Гродзенскага аблвыканкама Аляксандр Вярсоцкі падкрэсліў значнасць стварэння якаснага інфармацыйнага прадукту і звярнуў увагу рэдактараў на неабходнасць павелічэння аб'ёмаў манетызацыі кантэнту.
Аналізу развіцця Telegram-каналаў раённых газет свой даклад прысвяціла загадчык кафедры журналістыкі ГрДУ імя Янкі Купалы Іна Мінчук. Яна адзначыла, што з часу стварэння рэдакцыямі новых пляцовак дыстрыбуцыі кантэнту прайшло больш за год: раённыя газеты працуюць над павелічэннем колькасці падпісчыкаў, шукаюць фарматы прадстаўлення кантэнту ў сваіх Telegram-каналах, вызначаюць інструменты для прыцягнення пасродкам мессенджера чытачоў на сайты газет. Прадставіўшы досвед працы рэспубліканскіх СМІ ў дыстрыбуцыі кантэнту на платформе мессенджера Telegram, Іна Мінчук прапанавала магчымыя варыянты кантэнт-стратэгіі для Telegram-каналаў раённых газет Гродзенскай вобласці.
У дакладзе старэйшага выкладчыка кафедры журналістыкі ГрДУ імя Янкі Купалы Сяргея Ляшука «Новае лічбавае асяроддзе як фактар развіцця рэгіянальных СМІ: мадэлі і спосабы манетызацыі медыйнага кантэнту» былі прадстаўлены сучасныя спосабы прыцягнення грашовых сродкаў пры дапамозе развіцця інтэрнэт-рэсурсаў. Сяргей Ляшук прапанаваў сучасныя варыянты працы з банернай рэкламай, распавёў пра актуальныя спосабы манетызацыі шляхам стварэння натыўнай рэкламы і прадставіў вопыт сучасных медыя па выкарыстанні краудфандынгавых платформаў.
Сваім вопытам манетызацыі кантэнту ў лічбавым асяроддзі з удзельнікамі нарады-практыкума падзяліўся дырэктар тэлерадыёвяшчальнага канала «Гродна Плюс» Сяргей Мазайла. Ён распавёў пра нюансы манетызацыі кантэнту ў сацыяльных медыя, у тым ліку на хостынгу YouTube, у мессенжерах Telegram і Viber.
Рэгулярныя сустрэчы прадстаўнікоў выканаўчай улады, рэдакцый СМІ Гродзеншчыны і Купалаўскага ўніверсітэта ў рамках Інавацыйнага медыйнага кластара дазваляюць забяспечыць сувязь тэорыі і практыкі журналістыкі, а таксама дапамагаюць аператыўна рэагаваць на змены інфармацыйнай прасторы.
Гродзенскі дзяржаўны ўніверсітэт імя Янкі Купалы