У мерапрыемстве, якое адбудзецца ў Купалаўскім універсітэце 18 верасня, возьмуць удзел студэнты, уключаныя ў Банк даных адоранай і таленавітай моладзі.
Да ўдзелу ў семінары запрошаныя 28 студэнтаў старэйшых курсаў - прадстаўнікі кожнага факультэта Гродзенскага дзяржаўнага ўніверсітэта імя Янкі Купалы. Студэнты, працуючы ў групах, падзеляцца вопытам узаемадзеяння з настаўнікамі, пагавораць пра тое, якім, на іх думку, павінен быць ідэальны настаўнік.
Сярод запрошаных на семінар-практыкум таксама студэнты юрыдычнага факультэта ГрДУ імя Янкі Купалы - удзельнікі каманды «Купалаўцы», якая не раз станавілася прызёрам Беларускай студэнцкай юрыдычнай алімпіяды. Рабяты падзеляцца сваім вопытам паспяховага ўзаемадзеяння паміж настаўнікам і студэнтамі. Выступяць перад удзельнікамі семінара і паспяховыя выпускнікі Купалаўскага ўніверсітэта. У іх ліку Вікторыя Мядзведзева, пераможца Рэспубліканскага конкурсу навуковых работ студэнтаў, стыпендыят спецыяльнага фонду Прэзідэнта Рэспублікі Беларусь, якая ў цяперашні час працуе выкладчыкам кафедры сістэмнага праграмавання і камп'ютэрнай бяспекі ў родным універсітэце.
Семінар-практыкум «Настаўнік - студэнт: формула поспеху» ў Купалаўскім універсітэце пройдзе ўпершыню. Ідэя арганізаваць такое мерапрыемства з'явілася падчас сустрэчы з адоранымі і таленавітымі студэнтамі-першакурснікамі, якая адбылася ў мінулым годзе і дзе былі закрануты пытанні, звязаныя з важнасцю індывідуальнага настаўніцкага суправаджэння. У гэтым годзе фармат сустрэчы вырашана было крыху змяніць і запрасіць да абмеркавання актуальнай тэмы студэнтаў старэйшых курсаў, уключаных у Банк даных адоранай і таленавітай моладзі Гродзенскага дзяржаўнага ўніверсітэта імя Янкі Купалы. Асноўная мэта семінара-практыкума - раскрыць формулу паспяховага ўзаемадзеяння настаўніка і студэнта, вызначыць, якія падыходы ў зносінах будуць спрыяць дасягненню новых поспехаў у вучобе, навуцы, творчасці і спорце.
Гродзенскі дзяржаўны ўніверсітэт імя Янкі Купалы