Мерапрыемства пройдзе 18-19 чэрвеня ў маляўнічым месцы на беразе возера Белае.
Турыстычны злёт работнікаў Купалаўскага ўніверсітэта - адно з найбольш чаканых мерапрыемстваў, якое праводзіцца кожнае лета з мэтай папулярызацыі здаровага ладу жыцця, спартыўнага турызму і актыўнага адпачынку, а таксама фарміравання карпаратыўнага духу і здаровай канкурэнцыі, якая спрыяе згуртаванню калектыву. У праграме турыстычнага злёту - шматлікія спаборніцтвы і конкурсы. Сярод іх - прэзентацыя каманд-удзельніц, конкурс песні, настольны тэніс, дартс, футбольны і валейбольны конкурсы, эстафеты «Дружны калектыў». Прадугледжана таксама правядзенне інтэлектуальнай гульні «Ведаю ўсё пра Беларусь», конкурсу насценгазет, а таксама конкурсу чытальнікаў «Скарб слоў, песень і душы» і конкурсу па лоўлі рыбы на адкрытым вадаёме.
Вынікі турзлёту-2021 будуць падведзены па намінацыях «Лепшая насценгазета», «Лепшае прадстаўленне каманды», «Самая спартыўная каманда», «Самая лепшая каманда, якая спявае», «Самая крэатыўная каманда», «Самая эрудыяваная каманда», «Самая лірычная каманда». Пераможцы і ўдзельнікі будуць узнагароджаны дыпломамі і памятнымі прызамі.
Турыстычны злёт работнікаў Гродзенскага дзяржаўнага ўніверсітэта імя Янкі Купалы праводзіцца з 2018 года. Мерапрыемства праходзіць з нязменным поспехам, а дадому купалаўцы вяртаюцца з пазітыўнымі эмоцыямі і незабыўнымі ўражаннямі. Жадаем ўдзельнікам чарговага турзлёту добрага актыўнага адпачынку, а таксама перамог у творчых, спартыўных і інтэлектуальных выпрабаваннях!
Гродзенскі дзяржаўны ўніверсітэт імя Янкі Купалы