Мітынг-рэквіем з хвілінай маўчання ў памяць аб загінуўшых у гады Вялікай Айчыннай вайны прайшоў у гарадскім парку імя Жылібера.
Мітынг-рэквіем стаў працягам шматлікіх мерапрыемстваў, якія праходзілі ў рэгіёне ў ноч з 21 на 22 чэрвеня. Апоўдні мітынгі ля памятных месцаў з хвілінай маўчання і ўскладаннем кветак адначасова адбыліся ў многіх гарадах краіны.
У Гродне прадстаўнікі мясцовай улады, грамадскіх арганізацый, устаноў адукацыі, а таксама ветэраны Вялікай Айчыннай вайны і неабыякавыя жыхары горада сабраліся каля вечнага агню ў гарадскім парку імя Жылібера, каб ушанаваць памяць герояў, якія аддалі свае жыцці, абараняючы Радзіму. Мерапрыемства прайшло з удзелам старшыні Гродзенскага абласнога выканаўчага камітэта Уладзіміра Каранік.
- У гэты дзень роўна 80 гадоў таму на нашу зямлю прыйшла бяда, маштабы якой вельмі цяжка пераацаніць. Чатыры страшных гады вайны, якая захопнікамі задумвалася як вайна на знішчэнне. Важна, што літаральна з першых хвілін вайны нашы памежнікі, вайскоўцы Узброеных Сіл, мірнае насельніцтва даказалі, што яны нікому не дазволяць дыктаваць сваю волю, што яны заўсёды будуць гаспадарамі на сваёй зямлі, - падкрэсліў Уладзімір Каранік.
Удзельнікі мітынгу, сярод якіх былі рэктар ГрДУ імя Янкі Купалы Ірына Кітурка, прарэктар па выхаваўчай працы Васілій Сянько, супрацоўнікі і студэнты Купалаўскага ўніверсітэта, усклалі кветкі і вянкі да помніка савецкім воінам і партызанам, якія загінулі ў гады Вялікай Айчыннай вайны. Затым усе прысутныя ўшанавалі памяць ахвяр вайны хвілінай маўчання.
Гродзенскі дзяржаўны ўніверсітэт імя Янкі Купалы