Новымі рэзідэнтамі Навукова-тэхналагічнага парку сталі кампаніі, заснаваныя супрацоўнікам і выпускніком Купалаўскага ўніверсітэта.
Адна з кампаній заснавана дацэнтам кафедры агульнай і сацыяльнай псіхалогіі ГрДУ імя Янкі Купалы, кандыдатам псіхалагічных навук Ганнай Ракіцкай, якая плануе займацца аказаннем псіхалагічных паслуг насельніцтву, выкарыстоўваючы інавацыйныя навуковыя методыкі. Іншая кампанія-рэзідэнт Тэхнапарка - ТАА «Вібэнд» - заснаваная выпускніком Купалаўскага ўніверсітэта Яўгенам Міхаловічам, дзейнасць якога звязана са стварэннем IT-прадукцыі.
На падпісанні дагавораў з новымі рэзідэнтамі прысутнічалі першы прарэктар ГрДУ імя Янкі Купалы Юрый Раманоўскі і дырэктар Навукова-тэхналагічнага парку Купалаўскага ўніверсітэта Аляксандр Васілевіч.
- Мы назіраем вялікую цікавасць да развіцця інавацыйнага прадпрымальніцтва ў рэгіёне. На сённяшні дзень у нас 13 рэзідэнтаў Тэхнапарка, з іх 8 - гэта прадпрыемствы, створаныя супрацоўнікамі і студэнтамі Гродзенскага дзяржаўнага ўніверсітэта імя Янкі Купалы, - адзначыў Юрый Раманоўскі.
Дацэнт кафедры агульнай і сацыяльнай псіхалогіі ГрДУ імя Янкі Купалы, кандыдат псіхалагічных навук Ганна Ракіцкая на базе Навукова-тэхналагічнага парка плануе рэалізоўваць праект «Студыя спакою і добрага настрою».
- Мая дзейнасць як рэзідэнта Навукова-тэхналагічнага парку будзе шматпрофільнай, - распавяла Ганна Ракіцкая. - З аднаго боку, я планую ўкараняць у практыку вынікі ўласных навуковых даследаванняў, так як я навучаюся ў дактарантуры Беларускага дзяржаўнага ўніверсітэта, і мае дысертацыйныя даследаванні звязаны з асаблівасцямі ўзаемадзеяння ўнутры пары ў інтымна-асобасных узаемаадносінах, шлюбных адносінах. З іншага боку, у рамках майго праекту «Студыя спакою і добрага настрою» я збіраюся ўжываць у працы з кліентамі такі ўнікальны інавацыйны блок, які звязаны з рэлаксацыйныя і сугестыўная метадамі.
Ганна Ракіцкая таксама адзначыла, што для яе важна развіваць свае прадпрымальніцкія кампетэнцыі менавіта ва ўніверсітэцкай прасторы. Яна з'яўляецца выпускніцай Гродзенскага дзяржаўнага ўніверсітэта імя Янкі Купалы, тут жа скончыла магістратуру і аспірантуру, абараніла кандыдацкую дысертацыю, была дэканам факультэта псіхалогіі. Заснаваўшы кампанію, якая стала рэзідэнтам Тэхнапарка Купалаўскага ўніверсітэта, Ганна Ракіцкая мае намер працягваць рэалізоўваць свае магчымасці не толькі як прадпрымальнік, але і як навуковец.
У сваю чаргу, выпускнік ГрДУ імя Янкі Купалы, заснавальнік яшчэ адной кампаніі-рэзідэнта Тэхнапарка Яўген Міхаловіч падзяліўся тым, якім бачыць далейшыя перспектывы развіцця свайго прадпрыемства:
- Наша кампанія існуе ўжо два гады, і цяпер мы прынялі рашэнне атрымаць статус рэзідэнта Тэхнапарка ГрДУ імя Янкі Купалы. Я лічу, што гэта дасць нашаму бізнэсу новы імпульс для развіцця. Да таго ж, у нас працуюць студэнты ўніверсітэта, і, магчыма, ім будзе прасцей на базе Тэхнапарка прасоўваць ідэі нейкіх сваіх праектаў. Дарэчы, мы займаемся распрацоўкай праграмных прадуктаў. І ў апошні час задумаліся пра тое, каб стварыць IT-прадукт, які б прыносіў карысць беларускаму грамадству. Праект, над якім мы працуем зараз, будзе дапамагаць грамадскім арганізацыям або аб'яднанням улічваць, фармаваць, рабіць якія-небудзь выбаркі, атрымліваць аналітыку на аснове алгарытмаў машыннага навучання і весці пісьменны ўлік членаў сваіх арганізацый, што палегчыць і паскорыць працу адміністратараў. У членаў гэтых арганізацый таксама будзе доступ да інфармацыі аб тым, якія сяброўскія складкі яны выплачваюць, на якія льготы і прэферэнцыі могуць разлічваць.
Як расказаў першы прарэктар ГрДУ імя Янкі Купалы Юрый Раманоўскі, у цяперашні час працягваецца працэс уводу ў эксплуатацыю другой чаргі Навукова-тэхналагічнага парку. У новым будынку 16 вытворчых памяшканняў плошчай ад 180 да 280 квадратных метраў, а таксама 16 офісных памяшканняў. Больш за 300 квадратных метраў плануецца выкарыстаць для выставы дасягненняў прадпрыемстваў гродзенскага рэгіёну і не толькі. На дадзены момант каля 80 працэнтаў плошчаў другой чаргі Тэхнапарка ўжо зарэзерваваны. На арэнду офісных памяшканняў нават сфармаваўся конкурс. У прадпрымальнікаў усё яшчэ ёсць магчымасць заявіць пра сваё жаданне арандаваць вытворчыя памяшканні. Да супрацоўніцтва запрашаюцца ўсе зацікаўленыя прадстаўнікі бізнес-супольнасці.
Гродзенскі дзяржаўны ўніверсітэт імя Янкі Купалы