Турзлёт сабраў больш за 260 супрацоўнікаў на беразе маляўнічага возера Белае 17 і 18 чэрвеня. Купалаўцы не толькі цудоўна адпачылі, але і бліснулі акцёрскім талентам, спартыўнымі навыкамі і яшчэ больш умацавалі карпаратыўны дух.
Ніхто не застаўся ў баку. Усе купалаўцы падзяліліся на каманды і ўступілі ў турзлецкія спаборніцтвы! У праграме былі конкурс візітовак і насценгазет, перацягванне каната, валейбольны конкурс і спаборніцтва выступоўцаў, дзе ўдзельнікі чыталі творы Янкі Купалы.
З кожным годам жадаючых далучыцца да карпаратыўнага свята ўсё больш і больш, бо гэта так выдатна пакінуць на час гарадскія джунглі і кардынальна змяніць абстаноўку ў кампаніі вясёлых і пазітыўных калег. Дарэчы, першы турзлёт прайшоў у 2018 годзе па ініцыятыве рэктара ўніверсітэта Ірыны Кітурка.
Усе дружна падтрымлівалі адно аднаго як адна вялікая сям'я. Таму ўзнагароды атрымалі ўсе каманды, кожная ў асаблівай намінацыі. Несумненна, удзельнікі павезлі з сабой мора станоўчых эмоцый, зарад летняй энергіі і ад душы павесяліліся!
Гродзенскі дзяржаўны ўніверсітэт імя Янкі Купалы