Студэнты другога курса інжынерна-будаўнічага факультэта спецыяльнасці «Цеплагазазабеспячэнне, вентыляцыя і ахова паветранага басейна» завяршылі азнаямленчую практыку, якая стала першым крокам насустрач абранай спецыяльнасці.
Практыка студэнтаў праходзіла на працягу двух тыдняў і ўключала ў сябе экскурсіі па розных арганізацыям і прадпрыемствам. Кіраўніком практыкі ад факультэта выступіла Таццяна Вячаславаўна Булай, старшы выкладчык кафедры будаўнічай вытворчасці.
Пачалася азнаямленчая практыка з экскурсіі ў Рэсурсны цэнтр «Экатэхнапарк – Волма», дзе хлопцы пазнаёміліся з працай аднаўляльных і нетрадыцыйных крыніц энергіі, з абсталяваннем лабараторый «Разумны дом», «Біяэнергетыка».
Атрымаць уяўленне аб правілах і парадку праектавання сістэм ацяплення і вентыляцыі, з працай помпавых установак купалаўцам удалося на ўнітарным прадпрыемстве «Інстытут Гроднаграмадзянпраект», дзе галоўны спецыяліст па ацяпленні і вентыляцыі Аляксандр Цыбульнікаў і кіраўнік групы ПМ2 Вадзім каўняроў правялі для дзяцей аглядную экскурсію.
У ходзе азнаямленчай практыкі студэнты наведалі філіял Гродзенскага вытворчага ўпраўлення «Гроднагаз».
Выпускнік інжынерна-будаўнічага факультэта, а цяпер і начальнік ПТА Аляксей Забаўскі арганізаваў экскурсію па прадпрыемстве, дзе студэнты пазнаёміліся з арганізацыяй вытворчасці, сучасным абсталяваннем, наведалі кантрольна-дыспетчарскі пункт. Сустрэча прайшла ў рамках рэалізацыі мерапрыемстваў дарожнай карты супрацоўніцтва, падпісанай паміж «Гроднааблгаз» і Купалаўскім універсітэтам.
Азнаямленчая экскурсія адбылася і на цэх ачысткі прыродных і сцёкавых вод ААТ «Гроднаазот», дзе начальнік аддзялення бхо цэха распавёў аб усіх этапах і ўжывальных метадах працэсаў ачысткі сцёкавых вод, пачынаючы ад установак нитриденитрификации да установак біялагічнай ачысткі і ракі Нёман.
Заключным этапам практыкі, стала экскурсія на філіял «Гродзенскія цеплавыя сеткі» Рэспубліканскае ўнітарнае прадпрыемства «Гроднаэнерга».
Атрыманыя веды падчас вучэбна-азнаямленчай практыкі дазволяць студэнтам ўмацаваць цікавасць да абранай спецыяльнасці!
Гродзенскі дзяржаўны ўніверсітэт імя Янкі Купалы