13 і 14 кастрычніка ў Гродне прайшлі Алімпійскія дні моладзі Рэспублікі Беларусь па грэка-рымскай барацьбе. Студэнты ГрДУ імя Янкі Купалы паказалі бліскучы вынік!
У зале барацьбы Гродзенскага абласнога комплекснага цэнтра алімпійскага рэзерву прайшлі спаборніцтвы па грэка-рымскай барацьбе. За медалі змагаліся больш за 60 спартсменаў, прадстаўнікоў зборных каманд 6-ці абласцей і горада Мінска.
Адзначым, што падчас урачыстай цырымоніі адкрыцця саветнік Гродзенскага абласнога аб'яднання прафсаюзаў, старшыня абласной федэрацыі ГА «Беларуская федэрацыя барацьбы» Барыс Казялкоў уручыў узнагароду і падарунак бронзаваму прызёру чэмпіянату свету U20 Абдулмасіх Абдулмасіху і яго трэнеру.
На працягу двух дзён спартсмены паказвалі свае навыкі, сілу і цягавітасць, а таксама дэманстравалі спартыўны дух і гатоўнасць да барацьбы.
У выніку спаборніцтваў былі вызначаны пераможцы і прызёры ў кожнай вагавой катэгорыі. Самыя паспяховыя спартсмены былі ўзнагароджаны медалямі і граматамі за іх дасягненні. У камандным заліку Гродзенская вобласць стала абсалютным пераможцам і ўладальнікам золата, у складзе каманды выступалі студэнты ГрДУ імя Янкі Купалы.
У асабістым заліку 1 месца заняў студэнт факультэта фізічнай культуры Уладзіслаў Дуброўскі. Студэнт інжынерна-будаўнічага факультэта Павел Савіцкі заняў 2 месца.
Алімпійскія дні моладзі Рэспублікі Беларусь па грэка-рымскай барацьбе ў Гродне аказаліся паспяховымі і запамінальнымі. Гэта мерапрыемства дапамагло падтрымаць маладых спартсменаў, стымуляваць іх удзел у спартыўных спаборніцтвах і развіць спартыўны этыкет.
Гродзенскі дзяржаўны ўніверсітэт імя Янкі Купалы