У апошнія гады назіраецца хуткае развіццё новых спосабаў вывучэння замежных моў. З тэхналагічным прагрэсам і даступнасцю інтэрнэту навучэнцы атрымліваюць магчымасць выбіраць спосабы вывучэння моў з мноства інавацыйных методык.
Супрацоўнікі кафедры англійскай філалогіі Купалаўскага ўніверсітэта распрацавалі тэхналогію семантычнага карціравання ў працэсе вывучэння замежнай мовы. Тэхналогія ўяўляе сабой працэс графічнага выражэння радыянтнага мыслення пры рабоце з вялікімі аб'ёмамі інфармацыі.
Мэта распрацоўкі - дапамагчы навучэнцам універсітэтаў, каледжаў і школ павысіць іншамоўную камунікатыўную кампетэнцыю ў рэцэптыўных і прадуктыўных відах маўленчай дзейнасці. Ужыванне тэхналогіі семантычнага карціравання спрыяе больш эфектыўнаму засваенню замежнай мовы, падаючы магчымасць асэнсаванай апрацоўкі вялікіх аб'ёмаў інфармацыі, якая змяшчаецца ў друкаваных тэкстах і нятэкставых матэрыялах (відэа, аўдыёзапісы, малюнкі і г.д.).
Дадзеная тэхналогія адрозніваецца ад традыцыйных метадаў анатавання і канспектавання, паколькі яна дазваляе інтэграваць вербальны і невербальны кантэксты ў адным прадукце - семантычнай карце.
Тэхналогія семантычнага карціравання апрабавана ў Гродзенскай гарадской гімназіі імя А.І. Дубко.
Даведачна: Радыянтнае мысленне - гэта працэс мыслення, пры якім у цэнтры знаходзіцца нейкі аб'ект, які дае імпульс да нараджэння мноства асацыяцый, якія становяцца цэнтральным чынам ужо для іншага асацыятыўнага працэсу.
Гродзенскі дзяржаўны ўніверсітэт імя Янкі Купалы