16 красавіка ў навуковай бібліятэцы Купалаўскага ўніверсітэта прайшоў сёмы модуль семінара "Навуковыя камунікацыі ў прафесійнай дзейнасці: электронныя сэрвісы і бібліятэчныя інфармацыйныя тэхналогіі", які сабраў больш за 100 удзельнікаў. Спікерам мерапрыемства выступіў Уладзімір Галынскі, намеснік начальніка ўпраўлення міжнародных сувязей БДУ, кандыдат фізіка-матэматычных навук, дацэнт.
Уладзімір Міхайлавіч падрабязна расказаў аб сусветных навуковых рэйтынгах, прынцыпах іх функцыянавання, метадах пошуку навуковых выданняў, якія ўваходзяць у гэтыя рэйтынгі, а таксама аб спосабах натуральнага павелічэння індэкса цытуемасці навуковых прац. Пасля завяршэння афіцыйнай часткі семінара супрацоўнікі навуковай бібліятэкі і інфармацыйна-аналітычнага цэнтра ГрДУ імя Янкі Купалы прадоўжылі са спікерам абмеркаванне пытанняў навукаметрыі, падыходы работы калег з БДУ і ўласныя практыкі па рабоце з навукаметрычнымі базамі.
Семінар "Навуковыя камунікацыі ў прафесійнай дзейнасці: электронныя сэрвісы і бібліятэчныя інфармацыйныя тэхналогіі", арганізаваны навуковай бібліятэкай, за апошнія некалькі гадоў стаў платформай для абмеркавання актуальных пытанняў навуковай супольнасці. Удзельнікі семінара маюць магчымасць дзяліцца досведам, абмяркоўваць новыя тэндэнцыі і тэхналогіі ў галіне навуковай камунікацыі, а таксама знаходзіць шляхі для больш эфектыўнага ўзаемадзеяння паміж даследчыкамі і бібліятэкамі. У ходзе мерапрыемстваў разглядаюцца сучасныя электронныя рэсурсы, інструменты і метады, якія садзейнічаюць паляпшэнню доступу да навуковай інфармацыі і павышэнню якасці навуковых даследаванняў.
Гродзенскі дзяржаўны ўніверсітэт імя Янкі Купалы