Галоўная інтрыга штогадовых спаборніцтваў паміж друкаванымі СМІ Беларусі вырашылася ўчора, 6 мая. Названы імёны пераможцаў і лаўрэатаў конкурсу.
Сярод раённых, гарадскіх, карпаратыўных і шматтыражных друкаваных СМІ штомесячная газета Гродзенскага дзяржаўнага ўніверсітэта імя Янкі Купалы стала пераможцам у намінацыі "Лепшыя матэрыялы навуковай, навукова-папулярнай тэматыкі" па выніках працы ў 2019 годзе.
Усяго на конкурс было пададзена 400 заявак перыядычных выданняў, інфармацыйных агенцтваў і персаналій. З іх 269 - рэгіянальных СМІ ад 81 рэдакцыі, 108 заявак рэспубліканскіх СМІ ад 31 рэдакцыі, карпаратыўных - 23. Прыемна, што журы адзначыла не толькі актыўнасць друкаваных сродкаў масавай інфармацыі і сеткавых выданняў, але і высокі ўзровень прадстаўленых работ.
Газета "Гродзенскі ўніверсітэт" упэўнена канкурыруе з раённымі, гарадскімі, карпаратыўнымі і шматтыражных друкаваных СМІ - упершыню ўзнагароду ў той жа намінацыі яна атрымала ў 2017 годзе.
Асноўнай мэтай конкурсу з'яўляецца ўсебаковае садзейнічанне развіццю друкаваных сродкаў масавай інфармацыі Беларусі, актуалізацыя значных тэматычных напрамкаў дзейнасці друкаваных СМІ па рэалізацыі дзяржаўнай інфармацыйнай палітыкі, павышэнне прафесійнага і ідэйна-змястоўнага ўзроўню друкаваных СМІ, стымуляванне творчай дзейнасці журналістаў і іншых творчых работнікаў, занятых у працэсе вытворчасці друкаваных СМІ.
Урачыстая цырымонія ўзнагароджання пераможцаў конкурсу і ўручэнне дыпломаў і памятных знакаў-сімвалаў адбудзецца ў рамках мерапрыемстваў Міжнароднай спецыялізаванай выставы "СМІ ў Беларусі".
З поўным спісам пераможцаў і лаўрэатаў можна азнаёміцца па спасылцы.
Гродзенскі дзяржаўны ўніверсітэт імя Янкі Купалы