Трэці раз Летняя школа рускай мовы стартуе ў Гродзенскім дзяржаўным універсітэце імя Янкі Купалы. У гэтым годзе яна збірае рэкордную за ўвесь час правядзення колькасць удзельнікаў: 53 замежніка пачнуць вывучэнне рускай мовы і знаёмства з беларускай культурай сёння, 7 жніўня.
Геаграфія краін у 2017 годзе змянілася: упершыню ў Гродна едуць госці з Бразіліі і Швецыі, па традыцыі школа прымае ўдзельнікаў з Бельгіі, Германіі, Іспаніі, Італіі, Кітая, Пакістана, Польшчы, ЗША, Францыі і Японіі. Сярод іх студэнты, магістранты, аспіранты. Ёсць журналіст, інжынер, работнік Еўрапарламенту ў Брусэлі, а таксама выкладчык з Універсітэта Сант'яга-дэ-Кампостэла, які чытаў лекцыі ў купалаўскім універсітэце па праграме «Запрошаны прафесар».
Праект «Летняя школа рускай мовы - 2016» пакінуў шмат прыемных уражанняў і незабыўных успамінаў у замежнікаў, таму ў гэтым годзе вывучаць рускую мову і далей пазнаваць Беларусь працягне карэспандэнт з Берліна Бернд Адам і аспірант Варшаўскага ўніверсітэта Рафал Кучынскі. Адна з удзельніц Летніх школ мінулых гадоў будзе працаваць у якасці валанцёра.
Як распавяла каардынатар Летняй школы Ірына Краскоўская, аб праекце ГрДУ імя Янкі Купалы замежныя грамадзяне даведаюцца з розных крыніц. Дарэчы, у гэтай справе паспяхова дзейнічаюць партнёрскія сувязі, наладжаныя з многімі арганізацыямі і ўстановамі вышэйшай адукацыі розных краін. Так, дзякуючы супрацоўніцтву кафедры моўнай падрыхтоўкі беларускіх і замежных грамадзян з кафедрай прагматыкі камунікацый і лінгвадыдактыкі Інстытута русістыкі Гданьскага ўніверсітэта да нас не першы год прыязджае група польскіх студэнтаў. Узаемадзеянне з Германскай службай акадэмічных абменаў (DAAD) дазволіла не толькі распаўсюдзіць інфармацыю аб праекце, але і вылучыць чатыром студэнтам стыпендыі на навучанне ў школе. Удзельнік з ЗША даведаўся аб праекце праз ліст рассылкі Славянскіх і ўсходнееўрапейскіх моў і літаратур ва Універсітэце Алабама. Немалаважным у гэтай справе апынуліся стажыроўкі купалаўцаў за мяжой: адна са студэнтак ГрДУ імя Янкі Купалы распавяла аб Летняй школе дзецям у Італіі. Удзельнікі з іншых краін даведваліся пра усё ад былых ўдзельнікаў праекту.
Самаму малодшаму ўдзельніку Летняй школы рускай мовы-2017 - 19 гадоў, а самаму старэйшаму - 60 гадоў. Леташні праект сабраў 18 прадстаўніц прыгожага і 12 прадстаўнікоў моцнага полу, сёлета будуць вучыцца 29 дзяўчат і 24 хлопца і мужчыны.
Першыя ўдзельнікі прыбылі ў Гродна 4 жніўня. Па выніках тэсціравання згодна з ўзроўнямі валодання мовай замежнікаў падзеляць на сем груп, у якіх будуць працаваць выкладчыкі рускай мовы як замежнай: Іна Самойлава, Алена Білюценка, Наталля Музычэнка, Ірына Краскоўская, Таццяна Чаркес і Алена Мохань. Упершыню для выкладання запрошаны спецыяліст з Гродзенскага дзяржаўнага медыцынскага ўніверсітэта, выпускніца ГрДУ імя Янкі Купалы Алена Флянцікава.
Акрамя вучобы, для удзельнікаў Летняй школы традыцыйна падрыхтавана насычаная культурная праграма. Упершыню замежнікі будуць вывучаць не толькі рускую, але і беларускую мову, пазнаёмяцца з сучаснымі традыцыямі славян, а таксама самі прыгатуюць беларускія нацыянальныя стравы. Акрамя таго, гасцей чакаюць цікавыя лекцыі па культуры Беларусі, кіналекторыі, караоке па-руску, вечар у беларускім стылі, экскурсіі па Гродна і ў музеі горада, прагулкі па лесапаркавым зонам і пікнікі на беразе ракі, майстар-класы, трэнінгі, наведванне аднаго з прадпрыемстваў Гродна. Атрымаць асалоду ад прыгажосці беларускай прыроды госці змогуць падчас прагулкі на цеплаходзе па Нёмане.
Па заканчэнні праекта замежнікі атрымаюць сертыфікат удзельніка Летняй школы рускай мовы ГрДУ імя Янкі Купалы.
Нагадаем, што ўпершыню Летняя школа рускай мовы прайшла ў 2015 годзе. Тады ў Гродна прыехала 26 замежнікаў з дзевяці краін. Праект прадоўжыўся ў лютым наступнага года як «Зімовая школа рускай мовы». У цяперашні час Летняя і Зімовая школы паспяхова дзейнічаюць пры купалаўскім універсітэце і штогод збіраюць дзясяткі замежнікаў, якія жадаюць вывучаць рускую мову і знаёміцца з унікальнай культурай, традыцыямі, прыродай і архітэктурай Беларусі. Ініцыятарам і арганізатарам праекта выступае кафедра моўнай падрыхтоўкі беларускіх і замежных грамадзян факультэта давузаўскай падрыхтоўкі.
Гродзенскі дзяржаўны ўніверсітэт імя Янкі Купалы