Першыя сем дзён знаходжання ў Гродне для 53 замежнікаў, якія прыехалі вывучаць рускую мову ў Гродзенскі дзяржаўны ўніверсітэт імя Янкі Купалы, сталі часам спазнанняў, яркіх уражанняў і новых знаёмстваў.
У першы дзень Летняй школы ўдзельнікі прайшлі тэставанне, якое дапамагло выкладчыкам вызначыць узровень ведаў рускай мовы кожнага замежніка. Затым весела правялі час на інтэрактыўным занятку, дзе змаглі пазнаёміцца адзін з адным, а вечарам з экскурсіяй прайшліся па цэнтры Гродна.
На наступны дзень замежнікі прыступілі да ўдасканалення сваёй рускай мовы на занятках у групах: тут адны з удзельнікаў толькі пачалі вывучаць рускі алфавіт, іншыя знаёміліся з асновамі мовы і простымі фразамі, трэція акунуліся ў глыбіні рускай мовы. Акрамя вучэбнай часткі, госці пабывалі на лекцыі па гісторыі і культуры Беларусі, якую правёў загадчык кафедры турызму і культурнай спадчыны Сяргей Данскіх, і паглядзелі беларускія фільмы. Як адзначылі выкладчыкі школы, занятак па беларускаму кінематографу настолькі спадабаўся замежнікам, што адзін з вечароў госці прысвяцілі наведванню кінатэатра. Свой вольны час удзельнікі школы праводзілі, шпацыруючы па лесапарку «Пышкі».
Вечар знаёмстваў «Як добра, што ўсе мы тут сёння сабраліся» пакінуў шмат яркіх уражанняў і запомніўся замежнікам сваёй сяброўскай атмасферай.
– Хлопцы казалі толькі па-руску. Яны расказвалі пра сябе, пра сваю любімую радзіму, пра хобі і суправаджалі свае апавяданні вельмі цікавымі прэзентацыямі, - распавялі арганізатары Летняй школы рускай мовы-2017. -Нашы валанцёры падрыхтавалі выдатны канцэрт, на якім чыталі вершы, спявалі песні і нават арганізавалі для ўсіх удзельнікаў школы энергічны танец. Але гэта толькі пачатак: нашых гасцей чакае яшчэ шмат прыемных сюрпрызаў!
Упершыню многія з замежнікаў праспявалі на рускай мове падчас заняткаў «Караоке па-руску», а некаторыя з гасцей прыступілі да вывучэння беларускай мовы.
На выхадных ўдзельнікі Летняй школы рускай мовы-2017 наведалі сталіцу Беларусі. З сябрамі-валанцёрамі пабывалі ў музеі «Краіна Міні», дзе ўбачылі інтэрактыўныя архітэктурныя макеты славутасцей Беларусі, а пасля паспрабавалі нацыянальныя беларускія стравы і павандравалі па Мінску. Акрамя таго, з'ездзілі ў Ліду паглядзець на сярэднявечны замак, а па дарозе зазірнулі на шклозавод "Нёман" у Бярозаўцы. Некаторыя з замежнікаў наведалі Белавежскую пушчу і нацешыліся прыгажосцю і разнастайнасцю беларускай флоры і фауны.
Гродзенскі дзяржаўны ўніверсітэт імя Янкі Купалы