Упершыню ў рабоце лагера, акрамя навучэнцаў педагагічных класаў «Сярэдняй школы № 7 г. Ваўкавыска», прынялі ўдзел школьнікі Ленінскага раёна г. Гродна.
Падчас круглага стала «Настаўнік Next» - шлях у прафесію» школьнікі змаглі больш даведацца пра Гродзенскі дзяржаўны універсітэт імя Янкі Купалы. Павітала школьнікаў начальнік вучэбна-метадычнага ўпраўлення Марына Калацэй. Марына Яцэкаўна адзначыла важнасць прафесіі педагога, а таксама той факт, што 43% выпускнікоў Гродзенскага дзяржаўнага ўніверсітэта імя Янкі Купалы - выпускнікі менавіта педагагічных спецыяльнасцяў. Пра магчымасць паступіць на педагагічныя спецыяльнасці без уступных выпрабаванняў і асаблівасці навучання на педагагічным факультэце распавялі дацэнт кафедры прыродазнаўчых і лінгвістычных дысцыплін і методык іх выкладання Алена Лапкоўская і дацэнт кафедры прыродазнаўчых і лінгвістычных дысцыплін і методык іх выкладання Ганна Крофта.
У рамках профільнага лагера «Настаўнік Next» навучэнцы педагагічных класаў пазнаёміліся з філалагічным і фізіка-тэхнічным факультэтамі, з факультэтам гісторыі, камунікацыі і турызму, факультэтам псіхалогіі, а таксама мастацтваў і дызайну.
Таксама ў праграму мерапрыемства ўвайшлі майстар-клас для студэнтаў і выкладчыкаў «Развіццё творчага мыслення на ўроках рускай літаратуры праз выкарыстанне элементаў канвергентна педагогікі», выстава «Студэнцкая навука», майстар-клас «Скрынка з алоўкамі» і творчы вечар «КреаTEAM».
Нагадаем, што профільны лагер «Настаўнік Next», які ўпершыню прайшоў у 2016 годзе, з'яўляецца сумеснай ініцыятывай аддзела адукацыі, спорту і турызму Ваўкавыскага райвыканкама і педагагічнага факультэта Гродзенскага дзяржаўнага ўніверсітэта імя Янкі Купалы. Праект накіраваны на павышэнне прэстыжу педагагічнай прафесіі і прыцягненне будучых абітурыентаў.
Гродзенскі дзяржаўны ўніверсітэт імя Янкі Купалы