У рамках абароны дыпломных работ, выпускнікі прэзентавалі сем эксклюзіўных дызайнерскіх праектаў.
Па словах арганізатараў, абарона дыпломных праектаў у такім фармаце праходзіла ў шосты раз.
Гледачы - сярод якіх былі выкладчыкі, сям'і і сябры выпускнікоў - маглі назіраць моднае шоу, падчас якога былі прадэманстраваны сем гатовых калекцый адзення і аксесуараў prêt-à-porter de luxe.
Першай увазе аўдыторыі калекцыю адзення і аксесуараў прадставіла Наталля Здановіч. Дзяўчына, натхнёная жыццём і творчасцю мастачкі Фрыды Кала, стварыла неардынарную калекцыю, асаблівасцю якой стала адлюстраванне некалькіх бакоў характару сучаснай прадстаўніцы прыгожага полу: эпатаж, сіла, але ў той жа час жаноцкасць і прыгажосць. Старшыня экзаменацыйнай камісіі, дацэнт кафедры касцюма і тэкстылю Беларускай дзяржаўнай акадэміі мастацтваў, кандыдат мастацтвазнаўства Галіна Мяшкова падкрэсліла цікавую форму падачы касцюмаў і адзначыла, што своеасаблівая асоба Фрыды бударажыць шматлікіх дызайнераў.
Пяць жаноцкіх вобразаў калекцыі пад назвай «ART Flood» прадставіла Гульшада Імінава. Па словах аўтара, сучаснасць неабходна прадстаўляць праз прызму мінулага. Дзяўчына сцвярджае, што трэба ствараць, сціраць грані і ствараць новую гісторыю. Гістарычныя матывы адбіліся і ў калекцыі «Юстыніяна» Кацярыны Кашлявік. Дызайнер знайшла ідэю прадстаўленых вобразаў у культуры Візантыі. У разнастайнасці жаночых касцюмаў нестандартным стаў падыход выпускніцы Аксаны Старун, якая прадставіла экзаменацыйнай камісіі і гасцям мерапрыемства калекцыю мужчынскага адзення «Чарадзейны шэпт». Дзяўчына прэзентавала вынікі працы на беларускай мове, што таксама падкрэсліла гістарычныя і этнічныя матывы калекцыі.
Асаблівую цікавасць выклікаў паказ касцюмаў, створаны Анастасіяй Алесіюк. Дызайнер прадставіла шэсць нарадаў, выкананых у спартыўным стылі, але пры гэтым не пазбаўленых жаноцкасці. Па словах Анастасіі, яе натхнілі дасягненні спартсменаў Рэспублікі Беларусь. Варта адзначыць, што выпускніца не раз прымала ўдзел у конкурсах, як айчынных, так і замежных. У партфоліё ў пачаткоўца дызайнера - удзел у Рэспубліканскім фестывалі-конкурсе моды і фота «Млын Моды» і конкурсе «Lady Style», які праходзіў у Туле.
Па выніках абароны дыпломных работ ўсе студэнты атрымалі высокія ацэнкі. Таксама кожнаму прысвоена званне «дызайнер», да якога яны імкнуліся ўсе пяць гадоў навучання ў ГрДУ імя Янкі Купалы. Многія з іх працягнуць увасабляць свае смелыя ідэі ў Беларусі, а Гульшада Імінава плануе вярнуцца на радзіму і развіваць модную індустрыю Ашхабада.
Гродзенскі дзяржаўны ўніверсітэт імя Янкі Купалы