Гродненский государственный университет имени Янки Купалы - ГрДУ імя Янкі Купалы наведала дэлегацыя Нацыянальнага дзяржаўнага ўніверсітэта фізічнай культуры, спорту і здароўя імя П.Ф. Лесгафта (Санкт-Пецярбург)

Сустрэча кіраўніцтва Гродзенскага дзяржаўнага ўніверсітэта імя Янкі Купалы і Нацыянальнага дзяржаўнага ўніверсітэта фізічнай культуры, спорту і здароўя імя П.Ф. Лесгафта адбылася 5 ліпеня ў купалаўскім універсітэце.

У складзе дэлегацыі Нацыянальнага дзяржаўнага ўніверсітэта фізічнай культуры, спорту і здароўя імя П.Ф. Лесгафта рэктар Сяргей Бакулеў, прарэктар па навукова-даследчай працы Сяргей Ашкіназі і прарэктар па вучэбна-выхаваўчай працы Сяргей Пятроў.

Рэктар ГрДУ імя Янкі Купалы Ірына Кітурка, вітаючы гасцей, падзякавала за прыём дэлегацыі нашага ўніверсітэта ў Нацыянальным дзяржаўным універсітэце фізічнай культуры, спорту і здароўя імя П.Ф. Лесгафта ў красавіку гэтага года, а таксама падкрэсліла значнасць візіту ў адказ расійскіх калегаў. Ірына Фёдараўна распавяла аб Гродзенскім дзяржаўным універсітэце імя Янкі Купалы і яго магчымасцях. У сваю чаргу, госці адзначылі, што ўражаныя горадам Гродна і купалаўскім універсітэтам. «Гродзенскі дзяржаўны ўніверсітэт імя Янкі Купалы - унікальны ўніверсітэт, паколькі аб'ядноўвае розныя спецыяльнасці як гуманітарнага, так і тэхнічнага профілю. Прыемна, што два вядучыя ўніверсітэты пашыраюць і ўмацоўваюць супрацоўніцтва», - адзначыў рэктар НДУ імя П.Ф. Лесгафта Сяргей Бакулеў.

Падчас сустрэчы бакі абмеркавалі асноўныя напрамкі дзейнасці ў навуковай, вучэбнай, выхаваўчай рабоце і адукацыйныя магчымасці універсітэтаў, а таксама пытанні ўмацавання двухбаковых сувязяў, рэалізацыі мерапрыемстваў, накіраваных на пашырэнне ўзаемадзеяння і ўдзел у сумесных праектах. У прыватнасці, гаворка ішла аб супрацоўніцтве ў рамках праграмы «Запрошаны прафесар», абмене вопытам у камерцыялізацыі навуковых распрацовак, удзеле студэнтаў у спартыўных зборах, спаборніцтвах, навучальных практыках, арганізацыі стажыровак для выкладчыкаў, сумесных публікацыях у рэцэнзуемых навуковых выданнях, праектнай дзейнасці. Прадстаўнікі купалаўскага ўніверсітэта запрасілі калег да ўдзелу ў Адкрытым Міжнародным турніры па валейболе сярод жаночых каманд на Кубак рэктара ўніверсітэта, Летніх школах, якія арганізуюцца ў ГрДУ імя Янкі Купалы. Купалаўцы ў сваю чаргу атрымалі запрашэнне прыняць удзел у міжнародным кансорцыуме, які праходзіць на базе НДУ імя П.Ф. Лесгафта. На заканчэнне сустрэчы бакі адзначылі неабходнасць падмацавання існуючага паміж універсітэтамі дагавора праграмай супрацоўніцтва, а таксама прызначэння яе каардынатараў ад абодвух бакоў.

У рамках візіту прадстаўнікі НДУ імя П.Ф. Лесгафта наведалі практычны занятак па навучанні рухальным дзеянням на аснове прымянення камп'ютарных дыдактычных сродкаў. Таксама для гасцей былі арганізаваны экскурсіі па ўніверсітэце і г. Гродна.