Удзельнікі Летняй школы акрамя рускай вывучаюць беларускую мову, наведваюць майстар-класы і знаёмяцца з прадпрыемствамі горада.
Да заняткаў па рускай мове - «Дзелавая руская мова» і «Караоке па-руску» дадаўся курс «Пачынаем размаўляць па-беларуску», які праводзіць кандыдат філалагічных навук, дацэнт кафедры замежных моў Святлана Ляскевіч.
На інтэрактыўным мерапрыемстве «Вучым адзін аднаго» ўдзельнікі Летняй школы, выкладчыкі і валанцёры мелі магчымасць навучыцца рабіць арыгамі: японскіх жураўлікаў, лісу і іншых жывёл, экзатычныя кветкі, а слухачы з Кітая паказалі, як вырабіць з трубачак кітайскія зоркі. Для жадаючых навучыцца мастацтву танца таксама адбыліся майстар-класы: запальны азербайджанскі танец удзельнікі выканалі пад кіраўніцтвам слухача школы Юсіфа Гасанлы; пасля чаго прысутныя ў зале з задавальненнем станчылі італьянскую тарантэла. Таксама слухач з Італіі Кацярына Бары і студэнтка з Германіі Лідзія Хакенселлнер паказалі жадаючым асновы ігры на шасціструннай гітары. Скончыўся майстар-клас сумесным выкананнем вядомых песень на рускай мове. Пасля майстар-класаў удзельнікі пабывалі на кіналекторыі, дзе паглядзелі і абмеркавалі сучасную камедыю, дзеянне якой адбываецца ў Беларусі.
Экскурсія на прадпрыемства «Макей» дазволіла слухачам не толькі даведацца аб унікальнай прадукцыі, якую больш за 20 гадоў выпускае кампанія, але і ўбачыць працэс вытворчасці аўтарскіх вырабаў са скуры, а таксама паспрабаваць сябе ў ролі вытворцы. У фірмовай краме ўдзельнікі Летняй школы атрымалі магчымасць убачыць асартымент гатовай прадукцыі і абраць арыгінальны падарунак сабе і сваім блізкім на памяць пра Беларусь.
Замежныя госці пабывалі ў Народным мінералагічным музеі «Карат», які размяшчаецца ў сярэдняй школе №16 г. Гродна. Традыцыйна экскурсію праводзіў заснавальнік музея Уладзімір Жданюк. Удзельнікі Летняй школы даведаліся пра геалагічныя экспедыцыі і разнастайныя мінералы, а таксама паўдзельнічалі ў майстар-класе па апрацоўцы каменя.
Гродзенскі дзяржаўны ўніверсітэт імя Янкі Купалы