Больш за 600 удзельнікаў сабраў у ГрДУ імя Янкі Купалы ўнікальны фестываль навукі "Фізіка вакол нас".
Мерапрыемства наведалі навучэнцы сярэдніх школ і каледжаў вобласці. Фестываль выклікаў значную цікавасць і ў дзяцей малодшага школьнага ўзросту. Як распавёў дэкан фізіка-тэхнічнага факультэта Андрэй Герман, за тры гады правядзення мерапрыемства ахапіла звыш 2000 чалавек.
Арганізатарамі мерапрыемства, акрамя фізіка-тэхнічнага факультэта, выступілі Навукова-тэхналагічны парк ГрДУ імя Янкі Купалы, адукацыйны цэнтр Гродзенскага філіяла Парку высокіх тэхналогій, адукацыйныя цэнтры "Стемлаб" і "Разумны Мінск", а таксама школа лічбавых тэхналогій «Фарсайт».
Адзнакай трэцяга фестывалю стала істотна абноўленая праграма. Замест цырымоніі адкрыцця фестывалю арганізатары прадугледзелі круглы стол для старшакласнікаў «Soft + Hard = Physics», прысвечаны перспектывам атрымання адукацыі і працаўладкавання ў IT-індустрыі. У праграме круглага стала прынялі ўдзел 130 старшакласнікаў, якія выберуць траекторыю далейшай адукацыі.
Адкрыў круглы стол дэкан фізіка-тэхнічнага факультэта Андрэй Герман, які прадставіў удзельнікаў і распавёў пра перспектывы атрымання IT-адукацыі ў купалаўскім універсітэце.
Кіраўнік Гродзенскага філіяла Парку высокіх тэхналогій Юрый Вайтукевіч распавёў аб непарыўнай сувязі фізікі і інфармацыйных тэхналогій, прадставіў кампаніі-рэзідэнты Парку, адзначыўшы, што многія з іх створаны выпускнікамі купалаўскага ўніверсітэта. Таксама Юрый Вайтукевіч адказаў на пытанні ўдзельнікаў аб магчымасцях прыняць удзел у працы ПВТ і тым, як стаць яго рэзідэнтам.
Андрэй Герман прадставіў новую спецыяльнасць фізіка-тэхнічнага факультэта "Камп'ютарная фізіка", першы набор па якой плануецца ажыццявіць у 2019 годзе. Варта адзначыць, што выпускніку гэтай спецыяльнасці будзе прысвоена кваліфікацыя "Фізік. Праграміст", а навучальны план спецыяльнасці прадугледжвае паглыбленую падрыхтоўку па 6 модуляў і 25 дысцыплінах ў галіне інфармацыйных тэхналогій з магчымасцю выбару адукацыйнай траекторыі. Важным адрозненнем новай спецыяльнасці з'яўляецца фундаментальная падрыхтоўка па агульнай і тэарэтычнай фізіцы, а таксама вывучэнне электронікі, мікрапрацэсарнай тэхнікі, аўтаматызацыі і робататэхнікі. Усё гэта дае новыя магчымасці працаўладкавання не толькі ў IT-кампаніях, але і на сучасных высокатэхналагічных вытворчасцях.
У дыскусіі за круглым сталом таксама прынялі ўдзел загадчык кафедры інфармацыйных сістэм і тэхналогій Юрый Бяйцюк і загадчык кафедры тэарэтычнай фізікі і цеплатэхнікі Аляксей Іваноў. Рабят цікавілі пытанні па працаўладкаванні, а таксама магчымасці сумяшчэння адукацыі і працы.
Адначасова з круглым сталом пачалася практычная частка фестывалю, якая ўключыла ў сябе 20 займальных дэманстрацый і майстар-класаў ад навукоўцаў і студэнтаў універсітэта, а таксама ад партнёраў фестывалю.
Крыя-шоу з вадкім азотам "Экстрэмальны холад" праводзіў старшы выкладчык кафедры агульнай фізікі Андрэй Лавыш. Яму асіставала студэнтка 4 курса фізіка-тэхнічнага факультэта, пераможца конкурсу «Міс Гродна -2018» Анастасія Каваленка. Сумесна з імі займальныя эксперыменты і дэманстрацыі «Фізіка - гэта проста!» падрыхтавалі студэнты фізіка-тэхнічнага факультэта.
Займальныя аптычныя эксперыменты і дэманстрацыі "Дзіўны свет" паказалі Аляксандр Маскевіч, загадчык кафедры агульнай фізікі і Валянцін Аскірка, старшы выкладчык гэтай жа кафедры.
Пра адытыўная тэхналогіі распавялі Аляксандр Васілевіч, дырэктар РУП "УНПЦ "Тэхналаб" у статусе навукова-тэхналагічнага парку і яго супрацоўнікі, якія паказалі як працуюць 3D-друкаркі і сканары.
Дэманстрацыя "Усё пра з'яву электрамагнітнай індукцыі" была прадстаўлена прафесарам кафедры электратэхнікі і электронікі Іосіфам Зейліковічам.
Эксперыменты з лазерамі і электрычнымі разрадамі ў дзесяткі кілавольт, а таксама дэманстрацыю квантавых з'яў і эфектаў паказаў Вікенцій Таркоўскі, намеснік дэкана фізіка-тэхнічнага факультэта.
Заняткі па робататэхніцы з дэманстрацыяй незвычайных мадэляў робатаў прадставіў адукацыйны цэнтр Стэмлаб. Майстар-клас "Віртуальная і дапоўненая рэальнасць" з практычным заняткам па стварэнні 3D-праектара дапоўненай рэальнасці зацікавіў рабят усіх узростаў.
Адукацыйны цэнтр Стемлаб таксама прадставіў магчымасці стварэння аб'ёмных фігур з дапамогай 3D-ручак і майстар-клас па стварэнні простых электронных прылад і цацак.
Адукацыйны цэнтр Парку высокіх тэхналогій правёў майстар-класы па камп'ютарным мадэляванні фізічных працэсаў, FLASH-анімацыі і робататэхніцы.
Адукацыйны цэнтр "Разумны Мінск" распавёў школьнікам аб тым, што такое фотасінтэз і як вылучыць хларафіл з раслін. Лабараторыя хіміі цэнтра прадэманстравала, як прыгатаваць аналаг напою "Кока-Кола" і распавяла, ці варта яго ўжываць. Таксама "Разумны Мінск" правёў навуковы квэст для дзяцей, па выніках якога ўдзельнікі атрымалі падарункі.
Хітом мерапрыемстваў ад партнёраў стала прэзентацыя робатаў-маніпулятараў і станкоў з ЧПУ ад школы лічбавых тэхналогій «Фарсайт». Удзельнікі фестывалю атрымалі магчымасць азнаёміцца з прыладай і прынцыпам работы робатаў-маніпулятараў, лазернага фрэзера і мадэляў беспілотных транспартных сродкаў.
Фестываль уключыў у сябе мерапрыемствы, якія праводзяцца не толькі фізіка-тэхнічным факультэтам. Сярод іх "Фізіка і псіхалогія", дзе аб паводзінах чалавека з пункту гледжання тэорыі поля распавялі супрацоўнікі факультэта псіхалогіі. Філалагічны факультэт прадставіў займальную праграму «Магнетызм філалогіі», а інтэрактыўная пляцоўка "IT-востраў у лічбавай эканоміцы" была арганізавана факультэтам эканомікі і кіравання. На гэтай пляцоўцы наведвальнікі фестывалю змаглі пратэставаць свае магчымасці і выявіць схільнасці да IT- прафесіяў, даведацца пра Форэкс і біткоін, паспрабаваць сябе ў ролі стваральніка анімаваных і інтэрактыўных гісторый, прэзентацый, а таксама пазнаёміцца з праектамі, рэалізаванымі студэнтамі.
Падчас фестывалю ўдзельнікі наведалі суперкамп'ютэрны цэнтр ГрДУ, экскурсію па якім праводзіў дацэнт кафедры тэарэтычнай фізікі і цеплатэхнікі Аляксандр Нікіцін. Яшчэ адна экскурсія адбылася ў лабараторыю малекулярнай спектраскапіі і оптыкі нанаструктур, дзе прафесар кафедры агульнай фізікі Наталля Стрэкаль распавяла аб магчымасцях фізіка-тэхнічнага факультэта ў галіне нанатэхналогій і прадэманстравала ўнікальнае навукова-даследчае абсталяванне.
Гродзенскі дзяржаўны ўніверсітэт імя Янкі Купалы