Выданне манаграфій стала вынікам рэалізацыі беларуска-літоўскага праекту «Сацыяльныя інавацыі ў рэгіянальным кантэксце: сацыяльна-эканамічнае развіццё прыгарадных тэрыторый (з нізкім узроўнем урбанізацыі)», атрымальнiкам грантаў якога стаў факультэт эканомікі і кіравання.
У рамках даследавання навуковым калектывам было дадзена тэарэтычнае абгрунтаванне і праведзена сістэматызацыя сацыяльных інавацый, абгрунтаваны прапановы фарміравання эфектыўнага механізму фінансавання сацыяльнага развіцця тэрыторый з нізкім узроўнем урбанізацыі ў Рэспубліцы Беларусь і Літоўскай Рэспубліцы. Навукоўцамі вывучаны вопыт, як краін постсавецкага саюза, так і краін ЕС, што дазволіла ўнесці новыя падыходы ў вызначэнні канцэптуальных падыходаў да вызначэння сацыяльных інавацый, распрацаваць практычныя рэкамендацыі па правядзенні комплекснага эканамічнага аналізу ацэнкі якасці жыцця насельніцтва рэгіёнаў. У дадзенай методыцы выразна структураваны паказчыкі якасці жыцця, вызначаны іх уплыў на рэйтынг рэгіёну; распрацаваны інтэгральны паказчык, які дазваляе праводзіць параўнальны аналіз дывергенцыі якасці жыцця ў рэгіёнах Літвы і Беларусі з улікам тэрытарыяльных асаблівасцяў развіцця кожнага рэгіёну.
Характэрна, што фінансаванне гэтага праекта, які рэалізоўваўся на працягу двух гадоў, было атрымана ў выніку перамогі ў конкурсе праектаў па гранце «Беларусь-Літва» і ажыццяўлялася за кошт сродкаў БРФФД. Навуковым кіраўніком праекта выступіла дэкан факультэта эканомікі і кіравання Марына Карпіцкая. У правядзенні даследавання прымалі ўдзел магістранты і аспіранты факультэта эканомікі купалаўскага ўніверсітэта. Вынікі даследавання адлюстраваны ў іх кандыдацкай і магістарскай дысертацыі.
За перыяд выканання праекта было апублікавана больш за 30 публікацый у вядучых часопісах краін ЕС і краін СНД, праведзена абмеркаванне вынікаў даследавання з прыцягненнем вучоных-эканамістаў з розных краін, практыкаў і прадстаўнікоў мясцовых органаў улады. Галоўным вынікам даследавання стала падрыхтоўка двух манаграфій.
Аўтарамі праекта выдадзена за мяжой манаграфія на англійскай мове «Social Innovation in the Regional Context» (Сацыяльныя інавацыі ў рэгіянальным кантэксце), пад агульнай рэдакцыяй М.Е. Карпіцкай, Т. Тамашунаса і С. Жычкене.
У снежні 2018 года ў Шаўляйскім універсітэце адбылася прэзентацыя дадзенай манаграфіі. На прэзентацыі выступілі прафесар Тэадорас Тамашунас, загадчыца кафедры бізнесу і сацыяльнага кіравання Сальвейг Скунчыкіене, якія пажадалі, каб першы беларуска-літоўскі даследчы праект быў працягнуты і ўмацаваў навуковыя сувязі ў рэалізацыі праграмы супрацоўніцтва паміж Купалаўскім і Шаўляйскім універсітэтамі. У сваім выступе к.э.н., дацэнт Лі Чон Ку прадставіў магчымасць развіцця дадзенага даследавання і на іншыя краіны (Латвія, Польшча).
На факультэце эканомікі і кіравання адбылося ўрачыстае ўручэнне усім аўтарам экзэмпляраў дадзенай манаграфіі. Навуковы кіраўнік тэмы і адказны рэдактар дадзенай манаграфіі, Марына Карпіцкая павіншавала ўвесь аўтарскі калектыў з выхадам у свет манаграфіі і падзякавала аўтарам за працу над яшчэ адной манаграфіяй на рускай мове, якая плануецца да выдання. Марына Яўгенаўна адзначыла, што дадзеныя выданні ўжо запатрабаваныя навукоўцамі-эканамістамі і практыкамі, якія займаюцца пытаннямі рэгіянальнага кіравання і сацыяльнымі інавацыямі. Варта адзначыць, што супрацоўніцтва ГрДУ імя Янкі Купалы і Шаўляйскага ўніверсітэта паспяхова рэалізуецца ўжо на працягу 15 гадоў, а факультэт сацыяльных навук Шаўляйскага ўніверсітэта з'яўляецца першым міжнародным партнёрам факультэта эканомікі і кіравання купалаўскага ўніверсітэта.
Важным з'яўляецца і той факт, што вынікі даследавання ўкаранення сацыяльных інавацый будуць выкарыстоўвацца як у навучальным працэсе для падрыхтоўкі спецыялістаў эканамічнага профілю, так і ў практычнай дзейнасці мясцовых органаў улады, пра што сведчаць і акты аб укараненні ў дзейнасць Гродзенскага гарадскога выканаўчага камітэта Рэспублікі Беларусь, Гродзенскай абласной установы фінансавай падтрымкі прадпрымальнікаў і акты ўкаранення ў навучальны працэс.
Як распавялі аўтары праекту, распрацаваныя рэкамендацыі па рэалізацыі сацыяльных інавацыйных праектаў і ацэнцы эфектыўнасці іх ўкаранення, дазволяць прымаць рашэнні на ўзроўні мясцовых органаў улады і паспрыяюць павышэнню эфектыўнасці развіцця тэрыторый з нізкім узроўнем урбанізацыі ў Беларусі і Літве.
Гродзенскі дзяржаўны ўніверсітэт імя Янкі Купалы