Візіт адбыўся ў рамках прэс-тура прадстаўнікоў сродкаў масавай інфармацыі Расійскай Федэрацыі ў Гродзенскую вобласць з 25 па 28 красавіка.
Сярод гасцей універсітэта - прадстаўнікі тэлеканала «Расія-24»: шэф-рэдактар прамога эфіру Андрэй Архіпаў, шэф-рэдактар службы збору інфармацыі Вольга Дудаладава і прадзюсар Сяргей Смірноў, начальнік службы Віталь Аруцюнян. ГрДУ імя Янкі Купалы таксама наведалі шэф-рэдактар тэлерадыёкампаніі «Урал» (г. Екацярынбург) Крысціна Свет-Якаўлева, шэф-рэдактар прадакшн-студыі «Сапраўднае тэлебачанне» (г. Калінінград) Ігар Саседка, шэф-рэдактар праграмы «Весткі ў 23.00» , галоўны рэдактар тэлеканала «Доктар», аўтар і вядучая грамадска-палітычнага ток-шоў «Меркаванне» Эвеліна Закамская.
У рамках візіту журналісты пазнаёміліся з найбуйнейшым рэгіянальным універсітэтам Беларусі, наведалі галерэю прафесараў універсітэта, паглядзелі выставу фотаработ удзельнікаў Рэспубліканскага маладзёжнага фестывалю-конкурсу «Медыясфера-2019», выставу студэнтаў факультэта мастацтваў і дызайну, прысвечаную Году малой радзімы, а таксама наведалі Студэнцкі медыяцэнтр пры кафедры журналістыкі. Пасля чаго прадстаўнікі расійскіх СМІ падзяліліся сваім прафесійным вопытам са студэнтамі факультэта гісторыі, камунікацыі і турызму і філалагічнага факультэта падчас тэматычных майстар-класаў.
Адкрыў серыю майстар-класаў вядомы беларускі журналіст Андрэй Крывашэеў, які пазначыў каштоўнасць сустрэч прафесійнай супольнасці і будучых спецыялістаў у сферы масмедыя ў падобным фармаце. Пасля чаго начальнік службы навін тэлеканала «Расія-24» Віталь Аруцюнян на прыкладзе праекта "Мабільны рэпарцёр" распавёў пра рост папулярнасці ў традыцыйных медыя т.зв. «Народнай журналістыкі».
Кіраўнік аддзела крэатыўнага планавання АТН Белтэлерадыёкампаніі Руслан Туркоў падзяліўся вопытам стварэння сацыяльных ролікаў, адказаў на пытанні студэнтаў спецыяльнасці "Журналістыка" і "Інфармацыя і камунікацыя" пра тое, як падняць узровень праглядаў матэрыялаў і чым вымераць эфектыўнасць работы крэатыўнага прадзюсара.
У сваю чаргу галоўны рэдактар тэлеканала «Доктар» Эвеліна Закамская распавяла пра сакрэты поспеху нішавых лічбавых тэлеканалаў і падзялілася з будучымі спецыялістамі ў сферы масмедыя сваім бачаннем перспектыў развіцця тэлевізійнай журналістыкі, а шэф-рэдактар праграмы «Весці а 23:00» Вольга Найман на прыкладзе аднаго з выпускаў сваёй праграмы паказала некалькі эфектыўных прыёмаў асвятлення экстраных навін у прамым тэлевізійным эфіры.
Завяршылася серыя майстар-класаў выступам шэф-рэдактара прамога эфіру тэлеканала «Расія-24» Андрэя Архіпава. Ён даў практычныя парады маладым журналістам пра тое, як зрабіць паспяховы старт у кар'еры, і як не згубіцца ў канкурэнтнай барацьбе за ўвагу аўдыторыі.
Варта адзначыць, што ў рамках візіту ў Гродзенскую вобласць журналісты наведалі ААТ "Гродзенскі мясакамбінат", сустрэліся з намеснікам старшыні Гродзенскага аблвыканкама Уладзімірам Лісковічам, наведалі ТРК "Гродна", Гродзенскі заапарк, Гродзенскі абласны тэатр лялек. Акрамя таго гасцей запрасілі на экскурсію па гістарычных мясцінах Гродна і на агратурыстычны комплекс «Гарадзенскі маёнтак" Каробчыцы "». Падчас прэс-тура журналісты пазнаёміліся з этна-культурнымі і гастранамічнымі асаблівасцямі беларусаў, наведалі партызанскі лагер.
Гродзенскі дзяржаўны ўніверсітэт імя Янкі Купалы