Урачыстая цырымонія адкрыцця турніру адбылася ў Купалаўскім універсітэце 20 верасня.
Спартсменаў і гасцей спаборніцтваў павітала рэктар Гродзенскага дзяржаўнага ўніверсітэта імя Янкі Купалы Ірына Кітурка:
– Сёння каманды сабраліся тут не толькі для таго, каб праверыць свае сілы, але і яшчэ раз даказаць усім, што спорт - гэта вельмі важны сродак дыпламатыі. Ён не мае межаў і аб'ядноўвае розныя краіны і народы, а вы - гэта багацце сваіх краін. Мы не проста ўшаноўваем заслужанага трэнера Беларусі Уладзіміра Карчэўскага, мы працягваем яго справу. Я жадаю ўсім сумленных перамог, пазітыўных эмоцый і моцнага сяброўства паміж камандамі!
Паспяховых спаборніцтваў і перамог спартсменкам пажадалі старшыня Гродзенскага гарадскога Савета дэпутатаў, старшыня Гродзенскага абласнога аддзялення Грамадскага аб'яднання «Беларуская федэрацыя валейбола» Барыс Фёдараў і старшыня Гродзенскага валейбольнага клуба «Камунальнік» Аляксей Сівірчукоў. Госці таксама накіравалі словы ўдзячнасці ў адрас рэктара Ірыны Кітурка і ўсяго калектыву ГрДУ імя Янкі Купалы за арганізацыю міжнароднага турніру.
Варта адзначыць, што ў гэтым годзе ў турніры бяруць удзел каманды з Беларусі, Украіны, Польшчы і Расіі. Гэта прадстаўніцы Беластоцкай акадэміі валейбола, Балтыйскага федэральнага ўніверсітэта ім. І. Канта, а таксама каманды «Валынь-універсітэт-АДЮШАР» і «Камунальнік-ГрДУ». Пераможцаў турніру назавуць 21 верасня.
Даведачна:
Карчэўскі Уладзімір Максімавіч - дацэнт, выдатнік фізічнай культуры СССР (1974), заслужаны трэнер БССР (1992), выдатнік адукацыі Беларусі (1996), заслужаны работнік фізічнай культуры і спорту Рэспублікі Беларусь (2000).
У.М. Карчэўскі ў ГрДУ імя Янкі Купалы працаваў на пасадах загадчыка кафедры спартыўных гульняў, дэкана факультэта фізічнай культуры.
За плённую дзейнасць у галіне адукацыі, фізічнай культуры і спорту В.М. Карчэўскі быў узнагароджаны Ганаровай граматай Прэзідыума Вярхоўнага Савета БССР (1980), Ганаровай граматай Гродзенскага гарадскога выканаўчага камітэта (2007), Ганаровай граматай Гродзенскага гарадскога Савета дэпутатаў (2009).
Гродзенскі дзяржаўны ўніверсітэт імя Янкі Купалы