ЦВК Беларусі 12 лістапада на пасяджэнні падвёў вынікі выбараў членаў Савета Рэспублікі Нацыянальнага сходу сёмага склікання і прыняў рашэнне аб рэгістрацыі абраных сенатараў.
Выбары ў верхнюю палату адбыліся 7 лістапада. У кожнай вобласці і Мінску на пасяджэннях дэпутатаў мясцовых Саветаў базавага ўзроўню, Мінгарсавета прайшло галасаванне па кандыдатах у сенатары. Абрана 56 чалавек, у тым ліку 11 членаў Савета Рэспублікі дзеючага склікання, 14 жанчын (25% ад агульнай колькасці). Адзін абраны сенатар ў цяперашні час з'яўляецца дэпутатам Палаты прадстаўнікоў, праінфармавала адказны сакратар ЦВК Алена Дмухайла.
Узроставае прадстаўніцтва Савета Рэспублікі новага склікання яна назвала аптымальным. Палова сенатараў ва ўзросце ад 50 да 60 гадоў, 37% - ад 40 да 50. Тром яшчэ няма сарака, чатыром - больш за 60 год.
Выбраныя члены Савета Рэспублікі прадстаўляюць розныя сферы. Так, 41% працуе ў адукацыі, культуры, навуцы і ахове здароўя. Амаль 11% сенатараў занятыя ў прамысловасці, транспарце і будаўніцтве, столькі ж - у сельскай гаспадарцы.
Першая сесія Савета Рэспублікі сёмага склікання павінна пачацца да 7 снежня. У ЦВК не выключылі, што першае пасяджэнне адбудзецца 5 ці 6 снежня.
Прадстаўляць Гродзенскую вобласць у Савеце Рэспублікі будуць першы прарэктар Гродзенскага дзяржаўнага ўніверсітэта імя Янкі Купалы Алег Раманаў, старшыня СВК «Азёры Гродзенскага раёна» Аляксандр Шышко, намеснік старшыні Гродзенскага аблвыканкама Віктар Лісковіч, галоўны рэдактар «Лідскай газеты» Кацярына Серафіновіч. Сенатарамі абраныя таксама дырэктар Навагрудскага дзяржаўнага сельскагаспадарчага прафесійнага ліцэя Эльвіра Сарока, рэктар Гродзенскага дзяржаўнага медыцынскага ўніверсітэта Віктар Сняжыцкі, дырэктар Гродзенскага абласнога драматычнага тэатра Ігар Гедзіч, намеснік дырэктара па развіцці СТАА "Контэ Спа" Валянцін Байко.
У тэму:
Савет Рэспублікі - палата тэрытарыяльнага прадстаўніцтва. Парадак яе фарміравання спалучае элементы выбарнасці і прызначэння. Па восем членаў абіраюцца ад кожнай вобласці і Мінска шляхам тайнага галасавання, яшчэ восем сенатараў прызначае Прэзідэнт.
Гродзенскі дзяржаўны ўніверсітэт імя Янкі Купалы