Удзельнікам трэба будзе распрацаваць і прэзентаваць праграмны прадукт для патрэб бізнесу рэгіянальнай кампаніі.
У спаборніцтвах па конкурснай кампетэнцыі «Праграмныя рашэнні для бізнесу» прымаюць удзел студэнты Купалаўскага ўніверсітэта і навучэнцы Гродзенскага дзяржаўнага політэхнічнага каледжа. Агульная задача - распрацаваць інфармацыйную сістэму для кампаніі, якая займаецца пасажыраперавозкамі. Конкурснае заданне разабіта на 4 сесіі, кожная з якіх выконваецца на працягу двух з паловай гадзін. Якасць выкананых заданняў ацэньваецца экспертамі - прадстаўнікамі кампаній-распрацоўнікаў праграмнага забеспячэння.
- Зараз праходзіць адбор удзельнікаў абласнога этапу спаборніцтваў на ўзроўні навучальных устаноў. У выніку, не больш за тры прадстаўнікі ад кожнай навучальнай установы атрымаюць права ўдзельнічаць у абласным этапе, правядзенне якога запланавана на студзень. І толькі адзін пераможца абласных спаборніцтваў будзе ўдзельнічаць у рэспубліканскім чэмпіянаце ў маі, - распавяла эксперт па кампетэнцыі «Праграмныя рашэнні для бізнесу» Вольга Арэхава.
У пачатку першага конкурснага дня з прывітальным словам да ўдзельнікаў спаборніцтваў звярнуўся прарэктар па вучэбнай працы Генадзій Гачко. Ён звярнуў увагу канкурсантаў на тое, што праграмныя рашэнні для бізнесу - вельмі запатрабаваны кірунак, а ўдзел у такім конкурсе - не толькі выдатная магчымасць для студэнтаў і навучэнцаў каледжаў удасканаліць свае кампетэнцыі, але таксама і шанец знайсці будучых працадаўцаў з вельмі прэстыжных буйных кампаній.
- У нас невялікія традыцыі ўдзелу ў конкурсе прафесійнага майстэрства «WorldSkills». Але ў апошнія гады не толькі ўстановы прафесійна-тэхнічнай адукацыі, але і ўніверсітэты нашай краіны ўсё больш актыўна ўдзельнічаюць у гэтых спаборніцтвах. Таму хочацца пажадаць удзельнікам сённяшніх спаборніцтваў поспехаў і рэальных дасягненняў, - адзначыў Генадзій Гачко.
Беларусь далучылася да конкурсу прафесійнага майстэрства «WorldSkills» у 2014 годзе. А ў спаборніцтвах па IT-кампетэнцыях прадстаўнікі нашай краіны ўпершыню прынялі ўдзел ў 2016 годзе. Сярод першых удзельнікаў быў і Дзяніс Чабярачка, які зараз з'яўляецца студэнтам ГрДУ імя Янкі Купалы. Па выніках Рэспубліканскага конкурсу прафесійнага майстэрства «WorldSkills Belarus 2016» ён заваяваў срэбра. Затым не менш паспяхова выступіў на V Нацыянальным чэмпіянаце «Маладыя прафесіяналы» у расійскім Краснадары, дзе зноў заняў другое месца ў заліку СНД. Дзяніс Чабярачка прыняў удзел у падрыхтоўцы да сусветнага чэмпіянату ў Кітаі і ў складзе нацыянальнай зборнай удзельнічаў у 44-м чэмпіянаце свету «WorldSkills Abu Dhabi 2017», які праходзіў у Аб'яднаных Арабскіх Эміратах. У мінулым годзе студэнт ГрДУ імя Янкі Купалы выступіў незалежным экспертам на рэспубліканскім этапе спаборніцтваў. Сёння Дзяніс Чабярачка - адзін з галоўных ініцыятараў правядзення першаснага этапу IV Рэспубліканскага конкурсу прафесійнага майстэрства «WorldSkills Belarus 2020» у родным універсітэце.
- Я загарэўся жаданнем паўдзельнічаць у спаборніцтвах «WorldSkills», калі вучыўся ў Гродзенскім дзяржаўным політэхнічным каледжы. Я быў захоплены праграмаваннем, пачаў інтэнсіўна рыхтавацца да спаборніцтваў і ў выніку выступіў даволі паспяхова, - распавёў Дзяніс Чабярачка. - Вядома, вырашыў, што спыняцца на дасягнутым нельга, пачаў далей развівацца і ўжо ў мінулым годзе быў запрошаны ў якасці эксперта на рэспубліканскі этап. Наогул, дзякуючы ўдзелу ў такіх спаборніцтвах, многія знаходзяць сабе патэнцыйных працадаўцаў, пачынаюць працаваць у буйных фірмах. А гэта сур'ёзная матывацыя і для сённяшніх удзельнікаў.
У спаборніцтвах першаснага этапу IV Рэспубліканскага конкурсу прафесійнага майстэрства «WorldSkills Belarus 2020», якія праходзяць 6 - 7 снежня ў ГрДУ імя Янкі Купалы, прымаюць удзел 12 чалавек: 9 студэнтаў і 3 навучэнцы Гродзенскага дзяржаўнага політэхнічнага каледжа. На працягу апошняга тыдня перад спаборніцтвамі для іх быў арганізаваны штодзённы трэнінг. Пераможцы будуць рэкамендаваны да ўдзелу ў рэгіянальным этапе конкурсу і ўзнагароджаны каштоўнымі прызамі ад спонсараў спаборніцтваў - кампаній ЗТАА «ЭПАМ Сістэмз» і ТАА «Азот». Кожны ўдзельнік спаборніцтва атрымае грашовую прэмію
.
Гродзенскі дзяржаўны ўніверсітэт імя Янкі Купалы