На працягу трох дзён студэнты працавалі над стварэннем канцэпцыі ідэальнай структуры студэнцкага самакіравання.
Мерапрыемства праходзіла пад агульнай назвай «Тандэм - партнёрства Германія - Беларусь акадэмічнае самакіраванне». Воркшоп быў арганізаваны ў рамках супрацоўніцтва ГрДУ імя Янкі Купалы з вышэйшымі навучальнымі ўстановамі Германіі: Дрэздэнскім тэхнічным ўніверсітэтам, Фрайбергскай горнай акадэміяй, а таксама Пастдамскім універсітэтам.
Студэнты дзвюх краін у творчых групах працавалі над стварэннем канцэпцыі ідэальнай структуры самакіравання. Свае ідэі яны прэзентавалі падчас фінальнай сустрэчы трохдзённага адукацыйнага воркшопа. Праекты тычыліся вырашэння адукацыйных і сацыяльных праблем, якія могуць паўстаць у студэнтаў, арганізацыі іх вольнага часу, а таксама рэалізацыі розных фарматаў удзелу студэнтаў у жыцці свайго ўніверсітэта. Па выніках воркшопа каля 30 студэнтаў з дзвюх краін атрымалі сертыфікаты міжнароднага праекта «Тандэм - партнёрства Германія - Беларусь акадэмічнае самакіраванне».
У заключным мерапрыемстве адукацыйнага воркшопа прыняў удзел канцлер Дрэздэнскага тэхнічнага ўніверсітэта Андрэас Хандшух. Госці з Германіі выказалі надзею ў будучым годзе сустрэцца зноў у рамках наступнага адукацыйнага воркшопа. У сваю чаргу, прарэктар па вучэбнай працы ГрДУ імя Янкі Купалы Юрый Бялых падзякаваў прадстаўнікам Дрэздэнскага тэхнічнага ўніверсітэта за ініцыятыўнасць, а сваіх калегаў-купалаўцаў - за выдатную арганізацыю мерапрыемства. А тое, што сустрэча прынесла шмат пазітыўных эмоцый, адзначыў Юрый Бялых, заўважна па агульным настроі студэнтаў, якія за апошнія тры дні набылі не толькі шмат новых ведаў, але і шмат добрых сяброў.
Гродзенскі дзяржаўны ўніверсітэт імя Янкі Купалы