Са здачай у эксплуатацыю другой чаргі Тэхнапарка кампаніі-рэзідэнты разлічваюць на значнае пашырэнне сваіх магчымасцяў.
Як распавёў галоўны інжынер ААТ «Гроднапрамбуд» Сяргей Пузакоў, актыўныя будаўнічыя працы вядуцца на аб'екце з канца мінулага года. У адпаведнасці з праектам штомесяц асвойваецца прыблізна мільён беларускіх рублёў. Агульны кошт аб'екта - каля 13 мільёнаў.
- Работы вядуцца, фактычна, толькі тры месяцы, але ўжо шмат зроблена. Мы ідзём з апярэджаннем графіка, - адзначыў Сяргей Пузакоў. - На працягу гэтага тыдня будуць скончаны цяжкія маналітныя працы. У красавіку завершым мур. І ўжо можна будзе займацца дахам і нават аздабленнем. Прадумваем і дызайн аб'екта: фасад будынка плануецца аформіць у чатырох колерах.
Агульная плошча новага будынка Навукова-тэхналагічнага парку ГрДУ імя Янкі Купалы - больш за 6,5 тысяч квадратных метраў. Тут будуць размяшчацца як офісныя, так і вытворчыя памяшканні, пляцоўкі open-space, co-working-цэнтры, вялікая канферэнц-зала, абсталяваная ўсім неабходным абсталяваннем.
- На сённяшні дзень існуючых плошчаў Тэхнапарка ўжо не хапае. І гэты факт толькі пацвярджае, што інавацыйныя распрацоўкі ў рэгіёне запатрабаваныя, - распавяла рэктар ГрДУ імя Янкі Купалы Ірына Кітурка. - Ужо цяпер ёсць рэзідэнты, якія чакаюць адкрыцця другой чаргі Навукова-тэхналагічнага парку. Аб'ект плануецца завяршыць восенню гэтага года.
ТАА «Класік Электра» - як раз з тых кампаній-рэзідэнтаў, якія чакаюць адкрыцця новага будынка Тэхнапарка, каб наладзіць стартавую вытворчасць. Кампанія ўжо каля года з'яўляецца рэзiдэнтам Навукова-тэхналагічнага парку ГрДУ імя Янкі Купалы і, паспяхова завяршыўшы працу па пошуку інвестыцый, у цяперашні час прыступае да вырабу ўніверсальных усталявальных камплектаў для пераўтварэння існуючага транспарту ў электрамабілі. Паралельна рэзідэнт плануе асвойваць такі кірунак, як вытворчасць здымных акумулятараў для малога транспарту, напрыклад, электраскутер.
- З уводам у эксплуатацыю другой чаргі Тэхнапарка мы разлічваем атрымаць каля 300 квадратных метраў для стартавай вытворчасці, - падзяліўся сваімі планамі дырэктар ТАА «Класік Электра» Сяргей Жыльцоў. - Дзейнасць нашай кампаніі арыентавана на тое, каб мадэрнізаваць існуючы транспарт ў электрычны. Калі распрацоўвалася дзяржаўная праграма па развіцці электратранспарту ў Беларусі, пытанне аб мадэрнізацыі існуючага транспарту засталося без належнай увагі. Але ж можна ўжо існуючыя транспартныя сродкі пераабсталяваць і ў далейшым выкарыстоўваць у якасці электрамабіляў. Мы вырашылі рэалізаваць такую ідэю. У краіне ў нас пакуль няма канкурэнтаў у гэтым напрамку. А другі напрамак, у якім працуе наша кампанія, - гэта вытворчасць здымных акумулятараў для электраскутара, трыцыкла, для службаў дастаўкі. Такія здымныя акумулятары дазволяць уладальнікам малога электратранспарту эканоміць час, які траціцца на падзарадку.
У кампаніі-рэзідэнта Тэхнапарка ТАА «Класік Электра» ужо ёсць заказчыкі, у тым ліку з-за мяжы: Чэхіі, Польшчы і іншых еўрапейскіх краін. Акрамя таго, камунальныя службы нашай рэспублікі таксама зацікавіліся магчымасцямі мадэрнізацыі свайго транспарту. Новыя вытворчыя плошчы, якія з'явяцца з уводам у эксплуатацыю другой чаргі Навукова-тэхналагічнага парку, дазволяць задаволіць усе інтарэсы заказчыкаў.
Тым часам колькасць рэзідэнтаў Тэхнапарка пастаянна расце. Так, 6 красавіка быў падпісаны дагавор з новым рэзідэнтам: кампанію, якая будзе займацца аказаннем паслуг у IT-галіне, заснаваў студэнт 2 курса факультэта матэматыкі і інфарматыкі ГрДУ імя Янкі Купалы Павел Раманец. Яго прадпрыемства стала восьмым рэзідэнтам Навукова-тэхналагічнага парку і трэцяй кампаніяй з тых, што былі заснаваныя студэнтамі і супрацоўнікамі Купалаўскага ўніверсітэта.
– Сёння Навукова-тэхналагічны парк, як і Гродзенскі дзяржаўны ўніверсітэт імя Янкі Купалы, - гэта інавацыйная пляцоўка, якая дазваляе, у першую чаргу, ператвараць у бізнес інавацыйныя ідэі нашых студэнтаў і выкладчыкаў, - распавяла рэктар ГрДУ імя Янкі Купалы Ірына Кітурка. - Але поле дзейнасці Навукова-тэхналагічнага парка значна шырэй. Можна сказаць, што ён фармуе прадпрымальніцкую і інавацыйную экасістэму ўсяго рэгіёну і ўсёй рэспублікі. Любы, у каго ёсць інавацыйная ідэя, можа звярнуцца ў Тэхнапарк, і тут падкажуць, як яе ўвасобіць у жыццё. Акрамя таго, важна, што рэзідэнты Навукова-тэхналагічнага парку ствараюць новыя працоўныя месцы. Да прыкладу, кампанія-рэзідэнт "Інфармацыйныя тэхналогіі ў будаўніцтве", створаная нашымі студэнтамі і супрацоўнікамі, у гэтым годзе працаўладкоўвае яшчэ двух выпускнікоў Купалаўскага ўніверсітэта.
Рэзідэнты Тэхнапарка могуць разлічваць не толькі на кваліфікаваную дапамогу і кансультацыі спецыялістаў у пошуках аптымальных шляхоў рэалізацыі інавацыйных ідэй, але і на істотныя льготы пры арэндзе высакаякаснага абсталявання, офісаў і вытворчых плошчаў. Дарэчы, абсталяванне ў Навукова-тэхналагічным парку ГрДУ імя Янкі Купалы, сапраўды, лепшае ў вобласці. Так, прафесійныя 3D-друкаркі, якія ў апошні час актыўна выкарыстоўваюцца для выканання заказаў прамысловых прадпрыемстваў рэгіёну, ужо на працягу некалькіх дзён працуюць на рэалізацыю важнага сацыяльнага праекта. У тэхнапарку прыступілі да стварэння ўніверсальных ахоўных экранаў, якія будуць скіраваны ў медыцынскія ўстановы вобласці. На працягу бліжэйшага месяца ўсе чатыры 3D-друкаркі Навукова-тэхналагічнага парку ГрДУ імя Янкі Купалы будуць друкаваць ахоўныя экраны для медыкаў. Абсталяванне будзе загружана максімальна, усяго плануецца надрукаваць каля тысячы штук.
Гродзенскі дзяржаўны ўніверсітэт імя Янкі Купалы