62 навучэнцаў агульнаадукацыйных сярэдніх школ і гімназій Гродна, Слоніма, Шчучына і Скідзеля далучацца да прафарыентацыйнага інтэнсіву ў перыяд з 3 па 5 лістапада.
Праект «PROF-вакацыі» стартаваў з відэаканферэнцыі, падчас якой на сувязь з рабятамі выйшлі эксперты - прадстаўнікі розных кампаній, якія паспяхова рэалізавалі сябе ў прафесіі. Яны падзяліліся сваім вопытам і меркаваннем пра тое, якія прафесіі будуць запатрабаваныя ў будучыні і якія прафесійныя навыкі неабходна развіваць ужо сёння.
- Мы хочам дапамагчы нашым патэнцыйным абітурыентам зрабіць яшчэ адзін упэўнены крок у напрамку выбару прафесіі, - адзначыў, адкрываючы прафарыентацыйны інтэнсіў, дэкан факультэта давузаўскай падрыхтоўкі ГрДУ імя Янкі Купалы Іосіф Дорняк. - Мэта праекта «PROF-вакацыі» - не ў тым, каб прапанаваць абітурыентам тую ці іншую спецыяльнасць, а ў тым, каб стварыць умовы для развіцця ў іх, як у будучых прафесіяналаў, кампетэнцый soft skills і hard skills. Ва ўніверсітэце назапашаны багаты вопыт з пункту гледжання рэсурснай і інтэлектуальнай базы, у нас вельмі моцны практыка-арыентаваны складнік адукацыйнага працэсу, таму, думаю, наш новы праект будзе рэалізаваны паспяхова.
У праграме другога дня інтэнсіву - наведванне факультэтаў Купалаўскага ўніверсітэта. Дарэчы, кожны з удзельнікаў праекта меў магчымасць загадзя вызначыцца з выбарам факультэта і напрамку, які яго цікавіць . Так, адзінаццацікласніца са Скідзеля Паліна Паляшук ужо вырашыла, што хоча стаць дызайнерам і таму з нецярпеннем чакае візіту на факультэт мастацтваў і дызайну.
- Прыняць удзел у праекце «PROF-вакацыі» мне прапанавалі нашы школьныя педагогі, і мне здалося гэта вельмі цікавым. Бо выбар прафесіі - вельмі важны этап у жыцці кожнага чалавека. Тым больш, што я ўжо вызначылася: збіраюся паступаць у Купалаўскі ўніверсітэт на факультэт мастацтваў і дызайну, хачу навучацца па спецыяльнасці «Дызайн графічны», - распавяла Паліна Паляшук.
А вось Максім Козіч, які вучыцца ў выпускным класе гімназіі №2 г. Гродна, канчатковы выбар пакуль не зрабіў і чакае, што «PROF-вакацыі» дапамогуць яму вызначыцца з факультэтам і спецыяльнасцю. У любым выпадку, падаваць дакументы на паступленне ў будучым годзе Максім збіраецца ў ГрДУ імя Янкі Купалы:
- Выбіраю паміж двума напрамкамі - электронным маркетынгам і праграмаваннем. Падчас «PROF-вакацый» планую пабываць як на факультэце матэматыкі і інфарматыкі, так і на факультэце эканомікі і кіравання. Хачу даведацца больш пра кожную са спецыяльнасцяў, якія цікавяць мяне, і зрабіць канчатковы выбар.
Да праекта далучыліся вучні 20-ці ўстаноў адукацыі розных гарадоў вобласці. У рамках прафарыентацыйнага інтэнсіву патэнцыйныя абітурыенты наведаюць 8 факультэтаў ГрДУ імя Янкі Купалы. Удзельнікам праекта прапануюць розныя фарматы правядзення мерапрыемстваў, сярод якіх бізнес-квіз, навучальныя трэнінгі, камандныя гульні і творчыя майстэрні. Вынікі першага прафарыентацыйнай інтэнсіву, арганізаванага Купалаўскім універсітэтам для старшакласнікаў, будуць падведзеныя 5 лістапада па круглым сталом.
Гродзенскі дзяржаўны ўніверсітэт імя Янкі Купалы