Сумесна з калегамі з універсітэтаў-партнёраў з Бельгіі, Іспаніі, Партугаліі, Швецыі і Аўстрыі прадстаўнікі Купалаўскага ўніверсітэта абмеркавалі перспектывы развіцця сучаснай адукацыі.
У анлайн-трэнінгах, арганізаваных у рамках праекта міжнароднай тэхнічнай дапамогі «Змены ў адукацыйным асяроддзі: прасоўванне інавацыйнага выкладання і навучання для паляпшэння адукацыйнай дзейнасці студэнтаў у краінах Усходняга партнёрства» (PRINTeL), прынялі ўдзел прадстаўнікі Левенскага каталіцкага ўніверсітэта (Бельгія), Універсітэта Барселоны ( Іспанія), універсітэта Порту (Партугалія), Лінчёпінскага ўніверсітэта (Швецыя), універсітэта прыкладных навук Грац (Аўстрыя).
Праграма правядзення онлайн-трэнінгаў была разлічана на тры дні, падчас якіх удзельнікі слухалі лекцыі, выконвалі індывідуальныя заданні і працавалі ў групах. Калегі з універсітэтаў розных еўрапейскіх краін абмеркавалі перспектывы сучаснай адукацыі ў кантэксце пераходу ў лічбавую сераду, а таксама ідэі па метадалогіі абнаўлення курсаў для онлайн-навучання. Асаблівая ўвага была ўдзелена тым навыкам выкладання і навучання, якія запатрабаваныя для электроннага навучання, а таксама метадалогіі ацэньвання вынікаў вучэбнай дзейнасці.
Па выніках онлайн-трэнінгаў, арганізаваных у рамках праекта міжнароднай тэхнічнай дапамогі, усе слухачы атрымалі сертыфікаты.
Гродзенскі дзяржаўны ўніверсітэт імя Янкі Купалы