Купалаўскі ўніверсітэт 20 сакавіка запрасіў абітурыентаў, іх бацькоў і педагогаў на віртуальны Дзень адчыненых дзвярэй.
З прывітальным словам да ўдзельнікаў віртуальнай сустрэчы звярнулася рэктар універсітэта Ірына Кітурка. Яна распавяла пра тое, якія магчымасці прапануе сваім студэнтам Купалаўскі ўніверсітэт.
- Рада вітаць вас у адным з лепшых універсітэтаў краіны, - адзначыла Ірына Кітурка. - Дасягненні Гродзенскага дзяржаўнага ўніверсітэта імя Янкі Купалы прызнаныя на сусветным узроўні. Мы займаем лідзіруючыя пазіцыі ў міжнародных рэйтынгах і па праву можам ганарыцца дасягненнямі не толькі ў адукацыі і навуцы, але і ў спорце і творчасці. Два гады запар Купалаўскі ўніверсітэт становіцца пераможцам Рэспубліканскай універсіяды. Прадстаўнікі нашага ўніверсітэта рэгулярна заваёўваюць узнагароды і ў спорце высокіх дасягненняў.
Рэктар распавяла абітурыентам пра шматпрофільнасць Купалаўскага ўніверсітэта, аб інавацыйным шляху развіцця, аб матэрыяльна-тэхнічнай базе і пра тое, што ў апошнія гады ва ўніверсітэце робіцца ўпор на развіццё бізнес-кампетэнцый супрацоўнікаў і студэнтаў.
- Для рэалізацыі вашых ідэй, матэрыяльнай падтрымкі студэнцкіх ініцыятыў у ГрДУ імя Янкі Купалы створаны Фонд інавацыйнага развіцця. Акрамя таго, ва ўніверсітэце дзейнічае Фонд падтрымкі адоранай і таленавітай моладзі, - адзначыла Ірына Кітурка. - Мы зробім усё, што ў нашых сілах, каб дапамагчы вам рэалізаваць ваш патэнцыял. Дарагія абітурыенты, мы вас чакаем у сценах Гродзенскага дзяржаўнага ўніверсітэта імя Янкі Купалы. Знайдзіце сябе з намі, у нашым універсітэце!
Падчас онлайн-падключэння ў абітурыентаў была магчымасць задаць пытанні рэктару. Рабяты цікавіліся ўмовамі атрымання імянной стыпендыі, пыталіся пра студэнцкія стартапы і пра вучобу на ваенным факультэце. Затым сваімі поспехамі і дасягненнямі падзяліліся студэнты і выпускнікі Купалаўскага ўніверсітэта. Абітурыентам распавялі пра магчымасці праграмы акадэмічнай мабільнасці Erasmus +, а таксама пра ўмовы пражывання ў інтэрнатах універсітэта іншагародніх студэнтаў.
На некаторыя асаблівасці ўступнай кампаніі гэтага года ў сваім выступленні звярнула ўвагу адказны сакратар прыёмнай камісіі Ірына Карлюкова. У прыватнасці, яна адзначыла, на якія новыя спецыяльнасці адкрывае набор ГрДУ імя Янкі Купалы ў 2021 годзе, а таксама распавяла, як будзе працаваць лічбавы кабінет абітурыента.
- У рэжыме онлайн абітурыенты змогуць атрымаць кансультацыі спецыялістаў факультэта, запоўніць дакументы, неабходныя для падачы ў прыёмную камісію, і адправіць іх у электронным выглядзе ў зручны час. Акрамя таго, будзе працаваць электронная чарга для асабістай падачы дакументаў у прыёмную камісію. Усю інфармацыю аб залічэнні абітурыенты будуць атрымліваць аператыўна таксама ў рэжыме онлайн, - распавяла Ірына Карлюкова.
Лічбавы кабінет і ўся актуальная для абітурыентаў інфармацыя аб умовах і парадку паступлення ў ГрДУ імя Янкі Купалы даступныя на сайце abit.by. Таксама ўжо цяпер там можна знайсці інфармацыю аб усіх запланаваных мерапрыемствах для абітурыентаў.
У рамках другога дня онлайн-марафона «Дні абітурыента Купалаўскага ўніверсітэта» працавалі інтэрактыўныя пляцоўкі факультэтаў і каледжаў ГрДУ імя Янкі Купалы. Для абітурыентаў, іх бацькоў і педагогаў правялі віртуальныя экскурсіі па факультэтах, распавялі пра спецыяльнасці і ўмовы прыёму, арганізавалі анлайн-кансультацыі і майстар-класы. 27 сакавіка Купалаўскі ўніверсітэт зноў запрашае на онлайн-сустрэчу абітурыентаў і іх бацькоў. Пазней пройдуць Дні адчыненых дзвярэй на кожным з факультэтаў Гродзенскага дзяржаўнага ўніверсітэта імя Янкі Купалы, а таксама плануецца іх правядзенне ў райцэнтрах Гродзенскай вобласці.
Гродзенскі дзяржаўны ўніверсітэт імя Янкі Купалы