У рамках праекта ў Купалаўскім універсітэце пройдзе конкурс відэаролікаў «Радкі Памяці» і тэатралізаваны конкурс ваенна-патрыятычных песень і вершаў «Вялікай Перамозе прысвячаецца ...».
Праект «Радкі Памяці» прымеркаваны да святкавання ў Беларусі 76-годдзя Перамогі савецкага народа ў Вялікай Айчыннай вайне. Асноўная яго мэта - выхаванне грамадзянскасці, патрыятызму і нацыянальнай самасвядомасці, развіццё духоўнага, інтэлектуальнага і творчага патэнцыялу моладзі Гродзеншчыны, увекавечанне памяці аб ваенных падзеях.
Прыняць удзел у конкурсе відэаролікаў «Радкі Памяці» можа моладзь ва ўзросце ад 14 гадоў да 31 года - гэта студэнты ўніверсітэтаў, школьнікі, навучэнцы ўстаноў сярэдняй спецыяльнай і прафесійна-тэхнічнай адукацыі. Творчыя працы ад удзельнікаў прымаюцца аргкамітэтам у любых жанрах - інтэрв'ю, рэпартаж, відэакліп. Відэапрацы павінны быць прысвечаныя ветэрану Вялікай Айчыннай вайны, яго гісторыі ўдзелу ў ваенных дзеяннях. Таксама гэта можа быць аповяд ветэрана аб ваенных падзеях ці яго ўспаміны пра баі, Дні Перамогі, сяброў і любімых, апавяданне пра франтавы шлях сваяка-ветэрана, пра гісторыю помнікаў воінскай славы, масавыя воінскія пахаванні.
Журы конкурсу ацэніць арыгінальнасць ідэі і формы прадстаўленых матэрыялаў, актуальнасць, дакладнасць, аргументаванасць, глыбіню прапрацоўкі тэмы, арыгінальнасць зместу і падыходу да раскрыцця задумы, а таксама тэхнічную якасць выканання, стылістычную і мастацкую выразнасць.
Удзельнікамі тэатралізаванага конкурсу ваенна-патрыятычных песень і вершаў «Вялікай Перамозе прысвячаецца ...» могуць стаць студэнты ўніверсітэтаў і каледжаў як індывідуальна, так і калектыўна. Конкурс пройдзе ў некалькіх намінацыях: рабяты павінны будуць выканаць адзін твор ваеннай тэматыкі ў выглядзе вакальнага нумару, чытання вершаў, інструментальнага нумара або тэатральнай пастаноўкі. У ходзе конкурсных выступленняў журы будзе ацэньваць узровень выканаўчага майстэрства, артыстызм і арыгінальнасць, сцэнічны вобраз удзельнікаў.
Заяўкі на ўдзел і творчыя работы (на конкурс відэаролікаў) прымаюцца да 27 красавіка. Больш падрабязна – у Палажэнні.
Падвядзенне вынікаў двух конкурсаў праекта «Радкі Памяці» і ўзнагароджанне пераможцаў у Купалаўскім універсітэце адбудзецца 7 мая. Таксама для ўсіх удзельнікаў будзе арганізавана экскурсія па месцах баявой славы.
Арганізатарамі праекта «Радкі Памяці» выступае аддзел падтрымкі і рэалізацыі маладзёжных праектаў і ініцыятыў УВРсМ сумесна з Цэнтрам студэнцкіх ініцыятыў, Каардынацыйным студэнцкім саветам і студэнцкім самакіраваннем факультэтаў.
Гродзенскі дзяржаўны ўніверсітэт імя Янкі Купалы