Навуковы форум аб'яднае больш за 150 студэнтаў, магістрантаў і аспірантаў з Беларусі, Расіі, Украіны, Казахстана, Польшчы і Кітая.
Канферэнцыя ў гэтым годзе адбудзецца ў онлайн фармаце ў кантэксце рэалізацыі Мэтаў устойлівага развіцця. Яна пачнецца 15 красавіка з круглага стала на базе Тэхналагічнага парку Купалаўскага ўніверсітэта на тэму: «Моладзевае інавацыйнае прадпрымальніцтва», дзе будуць прадстаўлены розныя формы падтрымкі моладзевага інавацыйнага прадпрымальніцтва ў мэтах дасягнення ўстойлівага развіцця. Начальнік Цэнтра трансферу тэхналогій ГрДУ імя Янкі Купалы Алена Апякун раскажа пра конкурс студэнцкіх стартап-праектаў «ИнНаСтарт» і створаны ва ўніверсітэце Фонд інавацыйнага развіцця, а дырэктар Гродзенскай абласной установы фінансавай падтрымкі прадпрымальнікаў Алег Шыраеў - аб дзяржаўных інструментах падтрымкі прадпрымальнікаў. Загадчык кафедры міжнароднага бізнесу і маркетынгу Лі Чон Ку прэзентуе міжнародны праект МТП «Турнір інавацыйных праектных рашэнняў / «Бізнес ЛАБ» Innovative Project Solutions Tournament "Business LAB" ENI-LLB-1-169, мэтай якога з'яўляецца прасоўванне інавацыйнай моладзевай кампетэнтнасці. Дырэктар «Студыі 111» Сяргей Ляшук раскажа пра досвед працы ў якасці рэзідэнта Тэхналагічнага парку ўніверсітэта.
У рамках правядзення круглага стала таксама запланавана падключэнне партнёраў факультэта эканомікі і кіравання ГрДУ імя Янкі Купалы: Універсітэта ў Беластоку (Польшча), Чарнавіцкага нацыянальнага ўніверсітэта імя Юрыя Фядзьковіча (Украіна), Казахскага ўніверсітэта эканомікі, фінансаў і міжнароднага гандлю «КазУЭФМТ». Сваімі прапановамі па формах падтрымкі моладзевага інавацыйнага прадпрымальніцтва ў мэтах дасягнення ўстойлівага развіцця падзеляцца прадстаўнікі Беларускага дзяржаўнага ўніверсітэта, Беларускага нацыянальна-тэхнічнага ўніверсітэта, Беларускага дзяржаўнага эканамічнага ўніверсітэта, Еўразійскага ўніверсітэта імя Л.М. Гумілёва (Казахстан).
Выступы з дакладамі працягнуцца 16 красавіка ў рэжыме онлайн на базе факультэта эканомікі і кіравання Купалаўскага ўніверсітэта ў рамках чатырох тэматычных пляцовак. Гэта «Інтэграцыя экалагічных, сацыяльных і эканамічных кампанентаў у стратэгіі ўстойлівага развіцця», «Бюджэтаванне і фінансаванне ўстойлівага развіцця прадпрыемстваў і рэгіёнаў», «Інфармацыйна-камунікацыйныя тэхналогіі ў дасягненні мэтаў устойлівага развіцця» і «Стварэнне лічбавай эканомікі: нацыянальны і міжнародны досвед».
Гродзенскі дзяржаўны ўніверсітэт імя Янкі Купалы