Спартовае мерапрыемства, якое адбылося 20 мая, аб'яднала каля 200 удзельнікаў.
Фестываль летніх відаў спорту ў ГрДУ імя Янкі Купалы праводзіцца ўжо ў трэці раз і аб'ядноўвае выкладчыкаў і супрацоўнікаў факультэтаў і структурных падраздзяленняў, а таксама каледжаў Купалаўскага ўніверсітэта. На пачатку свята адбылося ўрачыстае шэсце каманд факультэтаў і каледжаў, а затым да ўдзельнікаў фестывалю звярнулася рэктар ГрДУ імя Янкі Купалы Ірына Кітурка.
- Мы сёння сабраліся тут, каб працягнуць традыцыю, якая яшчэ раз пацвярджае, што ў нас, купалаўцаў, ёсць велізарнае жаданне быць адной сям'ёй. Выдатна быць разам, дзяліцца адзін з адным добрым настроем, займацца спортам дзеля захавання здароўя і падтрымання добрай фізічнай формы. Жадаю ўсім высокіх вынікаў. Няхай наш пазітыўны настрой і ў далейшым дае нам сілу для рэалізацыі разнастайных купалаўскіх праектаў, - сказала Ірына Кітурка.
Пасля цырымоніі адкрыцця фестывалю каманды прыступілі да размінкі, а затым да здачы нарматываў Дзяржаўнага фізкультурна-аздараўленчага комплексу Рэспублікі Беларусь.
- У асноўнай праграме фестывалю - бег на 30 метраў, скачок у даўжыню з месца, чаўночны бег, падыманне тулава са становішча лежачы, падцягванне, нахіл тулава наперад і бег на доўгую дыстанцыю - 1500 і 3000 метраў. У гэтым годзе мы вырашылі разнастаіць нашу праграму і ўключылі ў спартыўнае свята таксама валейбольны, баскетбольны і футбольны конкурсы і гульню «Бочэ». Пераможцы фестывалю будуць вызначаны ў чатырох узроставых катэгорыях, - адзначыў дэкан факультэта фізічнай культуры ГрДУ імя Янкі Купалы Віталь Храмаў.
Пераможцы і прызёры па выніках тэставання па Дзяржаўным фізкультурна-аздараўленчым комплексе Рэспублікі Беларусь былі вызначаны ў чатырох узроставых катэгорыях. Сярод мужчын у катэгорыі ад 23 да 29 гадоў першае месца заняў курсавы афіцэр батальёна курсантаў ваеннага факультэта Аляксандр Васілевіч, другое месца - спецыяліст кантрольна-рэвізійнага аддзела Радзівон Лялечнік і трэцяе месца - выкладчык юрыдычнага факультэта Максім Дудко. Ва ўзроставай катэгорыі 30-39 гадоў сярод мужчын лепшым апынуўся старшы выкладчык ваеннага факультэта Павел Кірмель, другое месца - у выкладчыка-начальніка фізічнай падрыхтоўкі і спорту ваеннага факультэта Івана Крупеніча, трэцяе месца заняў намеснік дэкана юрыдычнага факультэта Авакаў Вартанян. Сярод мужчын у катэгорыі 40-49 гадоў найбольшую колькасць балаў набраў старшы выкладчык факультэта эканомікі і кіравання Аляксандр Кулікоў, на другім месцы апынуўся дэкан факультэта інавацыйных тэхналогій машынабудавання Аляксандр Варанцоў і на трэцім - начальнік цыклу агульнавайсковых дысцыплін ваеннага факультэта Андрэй Дзенісенка. І ва ўзроставай катэгорыі 50-59 гадоў, а таксама старэйшых за 60 гадоў лепшым стаў дэкан факультэта фізічнай культуры Віталь Храмаў, другое месца заняў інструктар-метадыст спартыўнага клуба Эдуард Іваноў і трэцяе - тэхнік адміністрацыйна-гаспадарчага кіравання Юрый Іваноў.
Ва ўзроставай катэгорыі 23-29 гадоў сярод жанчын першае месца - у спецыяліста педагагічнага факультэта Марты Сярдзюк-Афанасьевай, на другім месцы, набраўшы аднолькавую колькасць балаў, размясціліся лабарант факультэта біялогіі і экалогіі Вольга Тумаш і метадыст упраўлення выхаваўчай работы з моладдзю Карына Млыноўская. Сярод жанчын ад 30 да 39 гадоў першае месца заняла намеснік дэкана факультэта матэматыкі і інфарматыкі Таццяна Ванькова, другое месца падзялілі выкладчык філалагічнага факультэта Святлана бізнай і спецыяліст Цэнтра інтэрнацыяналізацыі адукацыі Кацярына Бялова. Ва ўзроставай катэгорыі 40-49 гадоў сярод жанчын на першым месцы - супрацоўнік Тэхналагічнага каледжа ГрДУ імя Янкі Купалы Таццяна Навуменка, на другім - выкладчык факультэта гісторыі, камунікацыі і турызму Вольга Паўлюціна і на трэцім - начальнік аддзела справаводства і кантролю Анастасія Астаф'ева. І сярод жанчын у катэгорыі ад 50 да 59 гадоў і старэйшыя за 60 гадоў першае месца заняла дэкан факультэта эканомікі і кіравання Марына Карпіцкая, другое - намеснік галоўнага бухгалтара Марыя Грашчанка, трэцяе - бібліятэкар Навуковай бібліятэкі Купалаўскага ўніверсітэта Святлана Дзеціна.
Лепшай у "Футбольным конкурсе" сярод жанчын стала Іна Астроўская, начальнік аддзела падтрымкі маладзёжных праектаў і ініцыятыў УВРсМ, сярод мужчын першае месца ў намесніка начальніка ваеннага факультэта па вучэбнай і навуковай працы Генадзя Песляка. У "Валейбольным конкурсе" на першым месцы сярод жанчын апынулася Таццяна Навуменка, выкладчык Тэхналагічнага каледжа ГрДУ імя Янкі Купалы, лепшым сярод мужчын стаў Кірыл Акуліч, начальнік Спартыўнага клуба. Таксама ў рамках фестывалю адбыўся "Баскетбольны конкурс", дзе першае месца сярод жанчын заняла Валянціна Навойчык, дацэнт кафедры спартыўных гульняў факультэта фізічнай культуры, сярод мужчын лепшым апынуўся Іван Сергіенка, старшы выкладчык факультэта інавацыйных тэхналогій машынабудавання. Метадыст 1 катэгорыі аддзела аналітычнага, метадычнага і арганізацыйнага забеспячэння ідэалагічнай і выхаваўчай работы УВРсМ Алеся Добрук паказала лепшы вынік у гульні "Бачэ" сярод жанчын, дэкан факультэта інавацыйных тэхналогій машынабудавання Аляксандр Варанцоў стаў першым сярод мужчын.
.
Гродзенскі дзяржаўны ўніверсітэт імя Янкі Купалы