У Год гістарычнай памяці вельмі важна казаць аб мінулым нашай краіны, асабліва аб Вялікай Айчыннай вайне. Сёння да дыялогу запрасілі актыў моладзі нашай вобласці, каб абмеркаваць важнасць захавання гісторыі і культурнай спадчыны Беларусі.
Спікерамі на дыялогавай пляцоўцы сталі прадстаўнікі заканадаўчай улады. З моладдзю размаўлялі старшыня пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльным развіцці Віктар Лісковіч, старшыня Гродзенскага гарадскога Савета дэпутатаў Барыс Фёдараў, рэктар Гродзенскага дзяржаўнага ўніверсітэта імя Янкі Купалы Ірына Кітурка, якая з'яўляецца дэпутатам абласнога Савета дэпутатаў.
Віктар Лісковіч адзначыў, што дыскусіі ў рамках дыялогавых пляцовак і круглых сталоў не павінны заставацца ў сценах аўдыторый і кабінетаў.
– Захаванне гістарычнай памяці – гэта важная частка паспяховай пабудовы моцнай і незалежнай краіны. Бо на ўроках мінулага, на досведзе продкаў мы можам будаваць паспяховую будучыню. Незалежнасць нашай краіны далася няпроста, асабліва ў гады Вялікай Айчыннай вайны, пасля якой нашу Радзіму прыйшлося аднаўляць амаль з нуля. Задача моладзі - выкарыстоўваючы ўвесь назапашаны вопыт і ўрокі мінулага, прааналізаваўшы памылкі, выпрацаваць мадэль развіцця нашай краіны, - адзначыў Віктар Андрэевіч.
Ірына Фёдараўна падкрэсліла, што ва ўніверсітэце заўсёды імкнуцца запрашаць на дыскусійныя форумы знакавых асоб, якія змогуць кампетэнтна адказаць нават на самыя каверзныя пытанні моладзі.
- Неабходна фарміраваць партнёрскія адносіны паміж пакаленнямі. Паспяховае развіццё краіны залежыць ад узаемадзеяння моладзі і дарослых. Выдатна, калі мы вучымся адзін у аднаго, - адзначыла Ірына Фёдараўна. - Важны пасыл сённяшняй сустрэчы: гісторыя - гэта вялікая сіла, якая павінна перадавацца ад пакалення да пакалення, і яна павінна аб'ядноўваць людзей. Нельга забываць, што гісторыю можна пераасэнсоўваць, але нельга перапісваць. А мы жывем ва ўмовах, калі іншыя краіны спрабуюць гэта зрабіць. І сапраўдны патрыёт павінен ахоўваць сваю спадчыну.
Барыс Фёдараў акцэнтаваў увагу на захаванні гістарычнай спадчыны нашага горада і расказаў аб тым, якая ў гэтым напрамку вядзецца работа. Таксама дэпутат адзначыў, што яму заўсёды цікава мець зносіны з моладдзю і даведвацца, чым яна сёння жыве.
- Заўсёды з нецярпеннем чакаю пытанняў ад маладых людзей і на кожнай падобнай сустрэчы кажу, што не трэба саромецца! Толькі праз зносіны можна зразумець адзін аднаго і пабудаваць паспяховую будучыню, – адзначыў Барыс Васільевіч.
Моладзь актыўна далучылася да дыялогу. Удзельнікаў цікавілі аспекты, звязаныя з Годам гістарычнай памяці, у прыватнасці, што ён значыць для спікераў. Старэйшыя калегі сышліся ў меркаванні, што гісторыя і Год гістарычнай памяці - гэта будучыня, бо чым мацней падмурак, тым устойлівей сцены дома. Таксама ўдзельнікі дыялогу пагаварылі аб патрыятызме. Ірына Фёдараўна адзначыла, што патрыятызм - гэта любоў да Радзімы і сваіх людзей, гэта вялікая стваральная сіла.
Удзельнікі дыскусійнага форуму абмеркавалі крымінальную справу па факце генацыду насельніцтва ў гады Вялікай Айчыннай вайны, якую ўзбудзіла Генеральная пракуратара Рэспублікі Беларусь у мінулым годзе. Дэкан факультэта гісторыі камунікацыі і турызму Віктар Белазаровіч адзначыў, што з кожным годам усё больш і больш дакументаў уваходзіць у навуковы абарот, а гэта значыць, што мы больш даведаемся аб ваенным мінулым і тых злачынствах, што былі ўчынены супраць беларускага народа.
Ужо актыўна пачаўся запіс у працоўныя атрады. Моладзь цікавілася, на якіх будоўлях яна можа быць задзейнічана і як будуць аказваць дапамогу валанцёры ў працы Цягніка гістарычнай памяці.
У рамках адкрытага дыялогу ўдзельнікі таксама ў цэлым абмеркавалі сітуацыю ў свеце і ўпісалі яе ў гістарычны кантэкст. Завяршаючы сустрэчу, Віктар Лісковіч звярнуўся да моладзі:
- Наш сённяшні дыялог асаблівы яшчэ і тым, што ён наўпрост рэалізуе артыкулы, прапісаныя ў нашай Канстытуцыі, абноўлены праект якой зусім нядаўна ўступіў у сілу. Мы нясем адказнасць за захаванне гістарычнай памяці. Сёння падчас абмеркаванняў мы пераканаліся, што наша краіна ідзе правільным курсам: мірным і сацыяльна-арыентаваным. Наша дзяржава клапоціцца аб моладзі, што таксама адлюстравана ў Канстытуцыі. У рукі маладога пакалення аддадзена самае важнае - суверэннасць і незалежнасць Беларусі, - падсумаваў Віктар Лісковіч.
Гродзенскі дзяржаўны ўніверсітэт імя Янкі Купалы