Галоўныя рэдактары і супрацоўнікі раённых газет абмяркоўваюць выкарыстанне лічбавых медыяплатформ для развіцця рэгіянальных СМІ. Семінар-практыкум арганізаваны ў рамках Інавацыйнага медыйнага кластара.
Удзельнікі семінара, сярод якіх прадстаўнікі абласных і рэгіянальных медыя, сустрэліся на базе ўніверсітэта і абмяркоўваюць тэндэнцыі выкарыстання лічбавых медыяплатформ для развіцця рэгіянальных СМІ, спосабы адаптацыі медыятэксту і яго варыятыўнасці з улікам сучасных інфармацыйных пляцовак, а таксама абменьваюцца вопытам пісьменнага і эфектыўнага выкарыстання якасных інструментаў і тэхналогій узаемадзеяння з чытачом. Упершыню спікерам семінара стала галоўны рэдактар галоўнай рэдакцыі інфармацыі УП "БелТа" Алена Круталевіч.
У рамках семінара выкладчыкі кафедры журналістыкі дзеляцца вынікамі праведзеных навуковых даследаванняў з мэтай аналізу актуальнага стану і дынамікі СМІ ў сусветнай, краінавай і рэгіянальнай інфармацыйнай прасторы.
У час вітальнага слова начальнік галоўнага ўпраўлення ідэалагічнай работы і па справах моладзі Ігар Булаўка адзначыў, што ва ўмовах глабальнай інфармацыйнай вайны неабходна ўтрымліваць фокус увагі аўдыторыі на аб'ектыўнай і актуальнай інфармацыі, умела развенчваць фейкі.
- Струмені хлусні ў сетцы інтэрнэт сталі сур'ёзным фактарам уздзеяння на свядомасць людзей. У гэтых умовах рэгіянальныя СМІ адыгрываюць важную ролю ў інфармацыйнай палітыцы дзяржавы. У сучасным свеце нават невялікі прыпынак у развіцці можа быць багаты на сур'ёзныя наступствы, таму рэдакцыі павінны пастаянна ўдасканальвацца і трымаць руку на пульсе часу, - адзначыў Ігар Булаўка.
Прарэктар па выхаваўчай рабоце Гродзенскага дзяржаўнага ўніверсітэта імя Янкі Купалы Васіль Сянько, звяртаючыся да супрацоўнікаў СМІ, падкрэсліў, што ўзаемадзеянне ў рамках Інавацыйнага медыйнага кластара сапраўды вылілася ў плённую работу, якая дае магчымасць наладзіць карыснае для ўсіх бакоў узаемадзеянне.
Арганізатарамі мерапрыемства традыцыйна выступілі галоўнае ўпраўленне ідэалагічнай работы і па справах моладзі Гродзенскага абласнога выканаўчага камітэта, рэдакцыя абласной газеты "Гродзенская праўда", рэдакцыі раённых газет Гродзенскай вобласці і Купалаўскі ўніверсітэт.
Гродзенскі дзяржаўны ўніверсітэт імя Янкі Купалы