Міжнародны дзень сям'і адзначаецца штогод 15 мая. Да гэтага свята ўпершыню ў Купалаўскім універсітэце падрыхтавана насычаная праграма мерапрыемстваў. Пачаўся тыдзень сям'і 10 мая з інтэлектуальнай гульні "Законы сям'і".
Прывітала ўдзельнікаў арганізатар мерапрыемства - намеснік дэкана па ідэалагічнай і выхаваўчай рабоце педагагічнага факультэта Алена Лапкоўская. Яна адзначыла, што сям'я суправаджае чалавека на працягу ўсяго яго жыцця і для таго, каб быць шчаслівым у ім, трэба ведаць і выконваць правілы і законы пабудовы і функцыянавання сям'і. Менавіта таму тыдзень сям'і ў Купалаўскім універсітэце пачынаецца з інтэлектуальнай гульні "Законы сям'і".
Удзельнікамі інтэлектуальнай гульні сталі студэнты і выкладчыкі ў складзе шасці каманд. Спачатку арганізатары агучылі правілы. Гульня складалася з чатырох тураў: I тур - размінка, II тур - "Законы і правілы сям'і", III тур - "Сям'я і мастацтва" і IV тур - "У народзе гавораць". Усе пытанні датычыліся тэмы "Сям'я". Падводзячы вынікі, журы агучыла пераможцаў, якія былі ўдастоены дыпломаў І, ІІ і ІІІ ступені.
У той жа дзень увечары ў інтэрнаце па вуліцы Дубко, 20 прайшло пасяджэнне дыскусійнага клуба на тэму «Шлюб як прававы інстытут». Арганізатары мерапрыемства - намеснік дэкана па ідэалагічнай і выхаваўчай рабоце юрыдычнага факультэта Алена Корнева, дацэнт кафедры міжнароднага права Аксана Шупіцкая, старшы выкладчык кафедры міжнароднага права Вольга Еўдакіменка.
Таксама ў рамках тыдня сям'і пройдзе Рэспубліканская навукова-практычная канферэнцыя "Сям'я і сацыялізацыя падрастаючага пакалення", адбудзецца музычная віктарына "Сямейства меламанаў", у навуковай бібліятэцы будзе арганізавана выстаўка "Сямейны музей у чамадане" і прэзентацыйная пляцоўка "Мая сям'я". Завершаць тыдзень сям'і падзячны малебен і канцэртная праграма "Гімн сям'і".
Гродзенскі дзяржаўны ўніверсітэт імя Янкі Купалы