Чацвёрты Форум Асацыяцыі ВНУ Расіі і Беларусі праходзіць на базе Гродзенскага дзяржаўнага ўніверсітэта імя Янкі Купалы 29 і 30 чэрвеня. Мерапрыемства стартавала ў рамках ІХ Форума рэгіёнаў Расіі і Беларусі.
У форуме бяруць удзел больш за 80 прадстаўнікоў ВНУ дзвюх краін. Адкрылі Форум Асацыяцыі ВНУ Расіі і Беларусі секцыйныя пасяджэнні: "Рэалізацыя сумесных навукова-тэхнічных праектаў і праграм у мэтах забеспячэння імпартазамяшчэння і ўмацавання тэхналагічнай бяспекі" і "Акадэмічнае супрацоўніцтва як аснова ўстойлівага развіцця сацыяльнай сферы".
Як адзначыў старшыня Рэспубліканскага савета рэктараў устаноў вышэйшай адукацыі, рэктар Беларускага дзяржаўнага ўніверсітэта інфарматыкі і радыёэлектронікі Вадзім Богуш, форум стаў традыцыйным мерапрыемствам у календары падзей універсітэтаў Беларусі і Расіі. Папярэднія форумы прайшлі нягледзячы на пандэмію ды іншыя абставіны. Удзельнікі падзеі звязваліся з дапамогай сучасных тэхналогій і плённа працавалі ў любых умовах.
- На шчасце, у гэтым годзе эпідсітуацыя дазволіла ўсім нам сустрэцца ў вочным фармаце і пагутарыць асабіста. У рамках работы форуму будуць падпісаны больш за два дзясяткі пагадненняў па самых розных напрамках. Бо развіццё міжнароднага супрацоўніцтва грунтуецца менавіта на прамых дамовах паміж ВНУ. Гэты форум — гэта своеасаблівы парасон, пад якім могуць паспяхова развівацца адносіны ў навуковай, адукацыйнай, культурна-масавай, маладзёжнай сферах. Важнай тэмай нашых зносін стане камерцыялізацыя навуковых распрацовак і вырашэнне праблем імпартазамяшчэння, - распавёў Вадзім Богуш.
Члены Асацыяцыі ВНУ Расіі і Беларусі трымаюць сувязь не толькі ў рамках форуму. Праца над сумеснымі праектамі ідзе на пастаяннай аснове, расказаў рэктар Санкт-Пецярбургскага дзяржаўнага эканамічнага ўніверсітэта Ігар Максімцаў, які з'яўляецца старшынёй Асацыяцыі прарэктараў ВНУ Санкт-Пецярбурга па міжнародных сувязях.
- Несумненна, узровень узаемаадносін паміж універсітэтамі Беларусі і Расіі высокія, але заўсёды ёсць да чаго імкнуцца. Члены асацыяцыі настроены на плённую дзейнасць у рамках форуму. Гэта пляцоўка дае магчымасць падвесці глабальныя вынікі сумеснай работы, прааналізаваць атрыманыя вынікі. Абмяркуем з калегамі тое, як гарманізаваць усе існуючыя напрацоўкі. Хачу адзначыць, што я вельмі рады быць у Купалаўскім універсітэце, з якім у нашай ВНУ вельмі цёплыя адносіны, - падзяліўся Ігар Максімцаў, які з'яўляецца ганаровым прафесарам ГрДУ імя Янкі Купалы.
Як распавёў першы прарэктар ГрДУ імя Янкі Купалы Юрый Раманоўскі, наш універсітэт - актыўны ўдзельнік і Форума рэгіёнаў Беларусі і Расіі, і Форума Асацыяцыі ВНУ Расіі і Беларусі. Гродзенскі дзяржаўны ўніверсітэт імя Янкі Купалы аператыўна падключаецца да інтэграцыйных працэсаў у сферы адукацыі і навукі Саюзнай дзяржавы.
- Праца па наладжванні сувязяў паміж рознымі універсітэтамі ідзе паспяхова, і мы маем устояныя кантакты з многімі вышэйшымі школамі Расіі. Геаграфія супрацоўніцтва шырокая. У нас заключаны больш за 170 дагавораў аб супрацоўніцтве, і мы плануем знайсці новых партнёраў, - распавёў Юрый Раманоўскі.
Таксама першы праектар адзначыў, што паспяхова функцыянуюць праграмы акадэмічнай мабільнасці, ВНУ нашых краін абменьваюцца студэнтамі і выкладчыкамі, узаемаўзбагачаючы адна адну.
Праца ў секцыях Форума Асацыяцыі ВНУ Расіі і Беларусі атрымалася плённай і інфарматыўнай. Удзельнікі секцый выступілі з дакладамі аб дзейнасці сваіх універсітэтаў, абмеркавалі стратэгічныя шляхі развіцця міжуніверсітэцкага супрацоўніцтва.
ПРА АСАЦЫЯЦЫЮ
16 ліпеня 2019 года ў Санкт-Пецярбургу ў рамках VI Форума рэгіёнаў Расіі і Беларусі адбыўся першы Форум рэктараў ВНУ Расіі і Беларусі. 18 ліпеня прэзідэнты Расійскай Федэрацыі і Рэспублікі Беларусь прынялі ўдзел у пленарным пасяджэнні Форума рэгіёнаў Расіі і Беларусі. Адбылося падпісанне Дэкларацыі аб дзейнасці Асацыяцыі ВНУ Расіі і Беларусі. Дзейнасць Асацыяцыі прадугледжвае штогадовае правядзенне Форума рэктараў ВНУ Расіі і Беларусі. Стварэнне Асацыяцыі арыентавана на рэалізацыю навуковых і адукацыйных праектаў, узаемавыгаднае выкарыстанне патэнцыялу ВНУ дзвюх краін і развіццё акадэмічнай мабільнасці.
Гродзенскі дзяржаўны ўніверсітэт імя Янкі Купалы