У Гродзенскім дзяржаўным універсітэце імя Янкі Купалы адбылася сустрэча генеральнага дырэктара Цэнтра сучасных спартыўных тэхналогій канцэрна "Расэнергаатам" Сяргея Фаміна з прафесарска-выкладчыцкім складам і студэнцкім актывам па пытаннях узаемадзеяння ў частцы арганізацыі далейшага супрацоўніцтва па развіцці баскетбола 3х3 сярод студэнтаў Гродзенскай вобласці.
Вітаючы ўдзельнікаў сустрэчы, рэктар Купалаўскага ўніверсітэта Ірына Кітурка падзякавала Сяргею Фаміну за візіт, бо падобныя сустрэчы важныя і для прафесарска-выкладчыцкага складу, і для студэнтаў. Купалаўскі ўніверсітэт мае даўнія і глыбокія спартыўныя традыцыі, а нашы студэнты і выпускнікі паказваюць высокія вынікі на спаборніцтвах рэспубліканскага і сусветнага ўзроўняў.
Мы ў Купалаўскім універсітэце любім усе віды спорту! І калі ў мяне пытаюцца, якія з іх мне бліжэй за ўсё, заўсёды адказваю: тыя, дзе гуляюць нашы купалаўцы. Мы падтрымліваем не толькі спорт высокіх дасягненняў, але і ў цэлым заняткі фізкультурай і здаровы лад жыцця, - адзначыла Ірына Фёдараўна.
Беларусь і Расія рэалізуюць мноства сумесных спартыўных мерапрыемстваў, абменьваюцца вопытам, у тым ліку ў баскетболе 3х3, які апошнія гады набірае ўсё большую папулярнасць. Як расказаў Сяргей Фамін, напярэдадні новага года спраўджваюцца календары спартыўных мерапрыемстваў, удакладняецца дакументацыя, нарматыўна-прававая база, складаюцца расклады спаборніцтваў, таму такія сустрэчы вельмі актуальныя.
- Вельмі прыемна знаходзіцца ў сценах навучальнай установы, якая мае багатую гісторыю і вядома далёка за межамі не толькі Гродзенскай вобласці, але і Беларусі. Тут цудоўны факультэт фізічнай культуры, які рыхтуе высакакласных спецыялістаў. Думаю, нас чакае шмат цікавых сумесных мерапрыемстваў, - падзяліўся Сяргей Фамін.
Паводле слоў дэкана факультэта фізічнай культуры Віталя Храмава, асаблівасць баскетбола 3х3 заключаецца ў яго масавасці і даступнасці. Універсітэт мае заслугі ў гэтым відзе спорту не толькі на нацыянальнай, але і міжнароднай арэне. У спаборніцтвах па баскетболе 3х3 студэнты-спартсмены маюць ужо дастаткова высокі статус. Сённяшняе пагадненне дасць станоўчы імпульс для развіцця студэнцкага спорту ў гэтым напрамку.
Як расказаў старшы выкладчык кафедры спартыўных гульняў ГрДУ імя Янкі Купалы, галоўны трэнер жаночай нацыянальнай каманды па баскетболе 3х3 Андрэй Навойчык, Беларусь на міжнароднай спартыўнай арэне ўжо мае шмат яркіх поспехаў у гэтым відзе спорту:
- Літаральна за апошнія тры гады мы прынеслі ў скарбонку нашай краіны вялікую колькасць узнагарод. Гэта дастаткова цікавы і актыўны напрамак, які мы стараемся развіваць. Дарэчы, каля 80% нацыянальнай каманды па баскетболе - гэта прадстаўніцы Купалаўскага універсітэта.
Таксама ў рамках сустрэчы было падпісана яшчэ адно пагадненне аб супрацоўніцтве паміж упраўленнем спорту і турызму Гродзенскага аблвыканкама і Цэнтрам сучасных спартыўных тэхналогій канцэрна "Расэнергаатам".
Гродзенскі дзяржаўны ўніверсітэт імя Янкі Купалы