У Тэхнапарку «Сколкава» 17 лістапада 2022 г. прайшлі фінальныя мерапрыемствы Адкрытага Усерасійскага конкурсу студэнцкіх работ у галіне сувязяў з грамадскасцю і медыйных тэхналогій «Хрустальны Апельсін». Студэнты факультэта гісторыі камунікацыі і турызму ГрДУ імя Янкі Купалы Паліна Пракапеня і Дзмітрый Апон былі сярод удзельнікаў урачыстай цырымоніі ўзнагароджання пераможцаў.
Дзеці наведалі майстар-класы вядучых спецыялістаў PR і рэкламнага бізнесу, атрымалі карысныя веды ад экспертаў па маркетынгу і медыякамунікацыях, паўдзельнічалі ў прэзентацыях цікавых камунікацыйных праектаў. Займальная экскурсія па Тэхнапарку дазволіла ўдзельнікам фестывалю пазнаёміцца з гісторыяй і асаблівасцямі развіцця, напрамкамі працы і грандыёзнымі праектамі Інавацыйнага цэнтра.
Завяршыўся фестываль урачыстай цырымоніяй віншавання пераможцаў, на якой нашы студэнты, удзельнікі студэнцкага міждысцыплінарнага навуковага гуртка "Public History: гістарычныя веды ў сучасным грамадстве", былі ўзнагароджаны дыпломам III ступені ў намінацыі "Сувязі з грамадскасцю і медыйныя тэхналогіі ў дзяржаўных структурах" за навуковую працу «Гродна. Горад зачаравання».
"Хрустальны апельсін" - маладзёжны адукацыйны праект, які заваяваў шырокую вядомасць і прызнанне. Конкурс аб'ядноўвае тысячы студэнтаў, спрыяючы іх прафесійнаму росту і кар'ернаму старту ў сферы грамадскіх сувязей і камунікацый. Праводзіцца пры падтрымцы Камісіі па развіцці інфармацыйнай супольнасці, СМІ і масавых камунікацый Грамадскай палаты РФ.
Гродзенскі дзяржаўны ўніверсітэт імя Янкі Купалы