У Купалаўскім універсітэце прайшоў міжнародны навукова-метадычны анлайн-семінар "Тэхналогіі інфармацыйнага мадэлявання ў навучальным працэсе пры падрыхтоўцы інжынераў-будаўнікоў" у рамках "Welcome Day", арганізатарам якога выступіў інжынерна-будаўнічы факультэт.
У семінары прынялі ўдзел каля 100 выкладчыкаў і студэнтаў будаўнічых ВНУ Расіі, Кыргызскай рэспублікі, Казахстана, Рэспублікі Беларусь.
Інфармацыйнае мадэляванне аб'ектаў (BIM) - гэта новы погляд на працэс аптымізацыі праектавання і будаўніцтва. З дапамогай BIM тэхналогіі ствараецца інфармацыйная мадэль, якая забяспечвае дакладнае бачанне праекту ў цэлым. Гэта ўжо сучаснасць і будучыня ў будаўнічай галіне, што актуальна пры падрыхтоўцы інжынераў-будаўнікоў.
Адкрываючы семінар, дэкан інжынерна-будаўнічага факультэта Ала Волік прадставіла ўдзельнікам семінара інфармацыю аб арганізацыі навучальнага працэсу па адукацыйных праграмах будаўнічага кірунку ў сучасных умовах на інжынерна-будаўнічым факультэце.
Выкладчыкі інжынерна-будаўнічага факультэта Эдурад Гнядэк, Эдуард Мусафіраў, Таццяна Седляр і Ян Навіцкі падзяліліся вопытам укаранення і выкарыстання тэхналогіі інфармацыйнага мадэлявання ў навучальным працэсе ў сваіх дысцыплінах, расказалі аб выкарыстанні праграмных комплексаў пры правядзенні практычных, лабараторных работ, у курсавым і дыпломным праектах. Аляксандр Паўлаў падзяліўся вынікамі даследаванняў сваёй магістарскай дысертацыі "BIM-тэхналогіі пры праектаванні металічных канструкцый з дапамогай праграмнага комплексу Tekla Structures".
Усе ўдзельнікі ўдзячныя за прадстаўленую карысную інфармацыю і ўпэўнены, што гэты семінар надасць новы імпульс да супрацоўніцтва, абмену вопытам не толькі ў галіне арганізацыі адукацыйнага працэсу, але і ў іншых напрамках.
Гродзенскі дзяржаўны ўніверсітэт імя Янкі Купалы