Маштабная падзея збярэ моладзь у сценах гасціннага Купалаўскага ўніверсітэта другі раз. З 13 па 15 верасня ўдзельнікам трэба паказаць сябе не толькі ў спартыўных спаборніцтвах, але і ў інтэлектуальных.
Стаць удзельнікам турніру мог любы ўніверсітэт нашай краіны. У гэтым годзе заявіліся 9 каманд з розных куткоў Беларусі. У першы дзень удзельнікі прайшлі рэгістрацыю і былі запрошаны на арганізацыйны сход, дзе пазнаёміліся. У пазітыўнай і сяброўскай атмасферы рабяты актыўна размаўлялі, задавалі пытанні арганізатарам і атрымлівалі патрэбныя адказы.
Затым каманды з Беларускага дзяржаўнага ўніверсітэта, Беларускага дзяржаўнага ўніверсітэта інфарматыкі і радыёэлектронікі, Мінскага дзяржаўнага лінгвістычнага ўніверсітэта, Ваеннай акадэміі Рэспублікі Беларусь, Гродзенскага дзяржаўнага ўніверсітэта імя Янкі Купалы, Гродзенскага дзяржаўнага медыцынскага ўніверсітэта, Беларускай дзяржаўнай ордэнаў Кастрычніцкай Рэвалюцыі і Працоўнага Чырвонага Сцяга сельскагаспадарчай акадэміі, Брэсцкага дзяржаўнага ўніверсітэта імя А.С. Пушкіна і Брэсцкага дзяржаўнага тэхнічнага ўніверсітэта прынялі ўдзел у віктарыне «PRO.Беларусь». Усе пытанні былі звязаныя з нашай любімай краінай! Удзельнікам трэба было заклікаць на дапамогу ўсе веды з самых розных абласцей.
Першы дзень турніру для ўдзельнікаў стаў самым спакойным, а вось другі і трэці абяцаюць быць гарачымі! Пачне другі дзень спаборніцтваў яркае ўрачыстае адкрыццё інтэлектуальна-спартыўнага турніру «Беларусь: Адзінства. Незалежнасць. Будучыня». А далей дзень распісаны па гадзінах. Сачыце за абнаўленнямі ў нашых сацыяльных сетках і на сайце ўніверсітэта.
Турнір рэалізуецца ГрДУ імя Янкі Купалы пры падтрымцы Міністэрства адукацыі Рэспублікі Беларусь з удзелам зацікаўленых устаноў вышэйшай адукацыі Рэспублікі Беларусь. Ён накіраваны на фармаванне ў моладзі актыўнай грамадзянскай пазіцыі і патрыятызму, павагі да гісторыка-культурнай і духоўнай спадчыны, папулярызацыю здаровага ладу жыцця, а таксама на развіццё інтэлектуальна-творчай культуры.
Гродзенскі дзяржаўны ўніверсітэт імя Янкі Купалы