Грамадзянска-патрыятычны, праект «Дарогамі Перамогі», які рэалізуецца ў ГрДУ імя Янкі Купалы, удастоены гранта Прэзідэнта Рэспублікі Беларусь у сферы маладзёжнай палітыкі.
Распараджэнне аб выдзяленні грантаў на 2024 год было падпісана Кіраўніком дзяржавы Аляксандрам Рыгоравічам Лукашэнкам 3 студзеня 2024 года.
Мэта праекта – фарміраванне ў студэнцкай і навучэнскай моладзі актыўнай грамадзянскай пазіцыі, патрыятызму, раскрыццё іх творчага патэнцыялу; павагі да гісторыка-культурнай і духоўнай спадчыны, павышэнне ўзроўню каштоўнасных уяўленняў моладзі аб гістарычнай памяці; захаванне гістарычнай памяці аб героях Вялікай Айчыннай вайны, хроніцы вызвалення Гродзенскай вобласці ад нямецка-фашысцкіх захопнікаў; стварэнне інфармацыйнага асяроддзя для развіцця грамадзянскіх і патрыятычных якасцей у моладзі; падтрымка маладзёжных ініцыятыў.
Сутнасць праекта «Дарогамі Перамогі» адпавядае задачы дзяржаўнай праграмы «Адукацыя і маладзёжная палітыка» на 2021-2025 гады, падпраграмы 10 «Маладзёжная палітыка»: стварэнне ўмоў для эфектыўнай самарэалізацыі моладзі, фарміравання ў моладзі праз сістэму героіка-патрыятычнага і духоўна-маральнага выхавання грамадзянскай пазіцыі, любові да Радзімы, гонару за яе мінулае і сучаснасць, адказнасці за лёс Беларусі.
Праект прадугледжвае работу па двух напрамках – выступленне творчага калектыву студэнтаў Гродзенскага дзяржаўнага ўніверсітэта імя Янкі Купалы з літаратурна-музычнай пастаноўкай у спалучэнні з гістарычнымі фактамі, прысвечанымі Вялікай Айчыннай вайне, у гарадах, раённых цэнтрах Гродзенскай вобласці ў парадку іх вызвалення ад нямецка-фашысцкіх захопнікаў, а таксама здымка навучэнскай моладдзю ўстаноў адукацыі Гродзенскай вобласці кароткіх відэаролікаў аб памятных месцах гарадоў з інфармацыяй аб ходзе іх вызвалення.
Па выніках рэалізацыі двух напрамкаў плануецца стварэнне тэматычнага відэафільма аб ходзе вызвалення гарадоў, раённых цэнтраў Гродзенскай вобласці, а таксама распрацоўка электроннага фотаальбома і тэматычных інфармацыйных матэрыялаў для іх далейшага выкарыстання пры правядзенні Адзіных дзён інфармавання, правядзенні мерапрыемстваў інфармацыйна-адукацыйнага праекта «ШАГ» – «Школа Актыўнага Грамадзяніна» з мэтай патрыятычнага выхавання моладзі.
Грант Прэзідэнта Рэспублікі Беларусь у сферы маладзёжнай палітыкі стаў пацвярджэннем важнасці і актуальнасці гэтага праекта для грамадства. Яго рэалізацыя садзейнічае фарміраванню патрыятычнай свядомасці і грамадзянскай актыўнасці ў моладзі, а таксама садзейнічае ўмацаванню адзінства нацыі і захаванню гістарычнай памяці аб подзвігу продкаў.
Гродзенскі дзяржаўны ўніверсітэт імя Янкі Купалы