Каманда ГрДУ імя Янкі Купалы пад кіраўніцтвам рэктара Ірыны Кітуркі прыняла ўдзел у чэмпіянаце па стральбе сярод каманд праваахоўных ведамстваў і сілавых структур.
Ужо сёмы раз турнір праходзіць напярэдадні Дня абаронцаў Айчыны і Узброеных Сіл Рэспублікі Беларусь. Ганаровымі гасцямі мерапрыемства сталі памочнік Прэзідэнта – інспектар па Гродзенскай вобласці Юрый Караеў і старшыня цэнтральнага савета БФСТ «Дынама» Ігар Абярэмка. На ўрачыстым адкрыцці яны падзякавалі ўдзельнікам чэмпіянату за службу, пасля чаго самі далучыліся да спаборніцтваў у стральбе.
У бягучым годзе спаборніцтвы зведалі некаторыя змяненні, якія датычацца складу ўдзельнікаў. Цяпер у кожную каманду ўвайшлі кіраўнік, супрацоўнік і супрацоўніца. Усе яны дзівілі цэлі ў трох практыкаваннях: стральбе з пісталета Макарава, пнеўматычнага пісталета і малакалібернай вінтоўкі. На кожным з этапаў давалася выканаць тры пробныя і дзесяць заліковых стрэлаў.
Турнір стаў своеасаблівым выпрабаваннем для ўдзельнікаў. Каманда ГрДУ імя Янкі Купалы – рэктар Ірына Кітурка, курсавы афіцэр – псіхолаг Яўгенія Радзевіч, выкладчык кафедры тэорыі і арганізацыі фізічнай падрыхтоўкі вайскоўцаў Ігар Таўкач – прадэманстравала не толькі выдатныя навыкі ў стральбе, але і спартыўны дух, азарт і згуртаванасць калектыву.
Удзел у турніры стаў не толькі спартыўным выклікам, але і магчымасцю для прадстаўнікоў універсітэта адчуць сябе часткай важнай грамадскай падзеі.
Нагадаем, што Ірына Фёдараўна рэгулярна прымае ўдзел у спаборніцтвах па стральбе і заўсёды трапляе дакладна ў цэль!
Гродзенскі дзяржаўны ўніверсітэт імя Янкі Купалы