Гродзенскі дзяржаўны ўніверсітэт імя Янкі Купалы пашырае супрацоўніцтва з Кітайскай Народнай Рэспублікай. Усё больш навучальных устаноў прапануюць сумесную працу купалаўцам. Сярод новых партнёраў Ціндаоскае вышэйшае педагагічнае спецыяльнае вучылішча дашкольнай адукацыі. Сустрэча з калегамі прайшла ў анлайн-фармаце.
Да ўдзельнікаў сустрэчы звярнулася рэктар Гродзенскага дзяржаўнага ўніверсітэта імя Янкі Купалы Ірына Кітурка. Яна падзякавала кітайскім калегам за праяўленую цікавасць і выказала надзею на плённае супрацоўніцтва. Таксама Ірына Фёдараўна расказала пра канкурэнтныя перавагі Купалаўскага ўніверсітэта.
Дарэчы, ГрДУ імя Янкі Купалы ўжо на працягу многіх гадоў супрацоўнічае з Кітайскай Народнай Рэспублікай. Гісторыя ўзаемадзеяння пачалася ў 2001 годзе, калі быў падпісаны першы дагавор аб супрацоўніцтве, і сёння з установамі адукацыі КНР Купалаўскі ўніверсітэт працуе ў рамках 21 дагавора. Ва ўніверсітэце рэалізуецца Стратэгія па развіцці супрацоўніцтва з КНР у сферы адукацыі, якая з'яўляецца складовай часткай агульнай стратэгіі ўніверсітэта – Стратэгіі апераджальнага развіцця.
Сустрэча пераважна была прысвечана падрыхтоўцы спецыялістаў у галіне дашкольнай адукацыі. Яго магчымасці ў Купалаўскім універсітэце прэзентавалі дэкан педагагічнага факультэта Юрый Гняздоўскі і дырэктар Гуманітарнага каледжа ГрДУ імя Янкі Купалы Наталля Валковіч. Бакі, у прыватнасці, цікавіла арганізацыя сумеснай адукацыйнай праграмы па гэтым профілі. Для гэтага партнёры дамовіліся стварыць рабочую групу для прасоўвання праекта, а таксама ўзаемна наведаць навучальныя ўстановы.
Па выніку сустрэчы была падпісана дамова аб міжнародным супрацоўніцтве паміж Гродзенскім дзяржаўным універсітэтам імя Янкі Купалы і Ціндаоскім вышэйшым педагагічным спецыяльным вучылішчам дашкольнай адукацыі, што пасадзейнічае далейшаму развіццю партнёрскіх адносін.
Гродзенскі дзяржаўны ўніверсітэт імя Янкі Купалы